کابلده چینلیکلر رستورانتیده یوز بېرگن پارتلشدن سۉنگ، چین اېلچیخانهسی اوشبو مملکت یشاوچیلریدن افغانستانگه سفر قیلمسلیکنی سۉرهدی.
کابلدهگی چین اېلچیخانهسی تیناوون دوشنبه، 29 -جدی، اعلان قیلگن بیاناتیده افغانستاندهگی خوفسیزلیک حالتی هنوز آغیرلیگیچه قالهیاتگنینی بیلدیرگن.
اېلچیخانه ینه بیر بار چین یشاوچلرینی وقتینچه افغانستانگه سفر قیلمسلیککه چقیردی.
شونینگدېک، افغانستانده استقامت قیلهیاتگن چین کمپنیلری و یشاوچیلریدن قانون-قاعدهلرگه رعایه قیلیش و اۉز خوفسیزلیگیگه اعتبارلی بۉلیش سۉرهلگن.
بیاناتده چین یشاوچیلریگه گوجوم جایلر، دیني مسکنلر و رستورانتلرگه بارمسلیک توصیه اېتیلگن.
مذکور بیانات تیناوون کابلنینگ شهرنو منطقهسیده چینلیکلر رستورانتیده یوز بېرگن پارتلش عاقبتیده یېتّی کیشی اۉلیب، قریب 17 کیشی یرهلنگن بیر پیتده اعلان قیلیندی.
اوشبو پارتلشده بیر نفر چین یشاوچیسی و آلتی نفر افغانستانلیک اۉلگن.
داعش گروهی اوشبو پارتلش اوچون مسوولیتنی اۉز ذمّهسیگه آلدی.
