اروپا پارلمانینینگ اعضاسی هانا نویمان، طالباننینگ جنایت اصولنامهسی «عیاللر و قیزلرگه نسبتاً جنسی آپارتاید همده عملدهگی قوللیکنی رسميلشتیرهدی»، دېب ایتدی.
او ایکس اجتماعي ترماغیدهگی بیانات یازیب شوندهی دیگن: «طالبان افغانستانده ینگی «جنایت قانونی»نی جاري قیلدی. اصلیده اېسه، بو قانون عیاللر و قیزلرگه نسبتاً جنسی آپارتایدی عملدهگی قوللیکنی حجتلشتیرهدی.»
هانا نویمان طالباننینگ اۉز جنایتلری اوچون جوابگرلیککه تارتیلیشی کېچیکتیریب کېلینهیاتگنینی هم قۉشیمچه قیلدی. اوشونینگدېک، طالبان بیلن هېچ قندهی نورماللشوو بۉلمسلیگینی تأکیدلهدی.
طالبان یېتکچیسی یقینده اوشبو گروهنینگ «محکمهلر اوچون جنایت نظامی»نی تصدیقلهگن. مذکور اصولنامه کوچگه کیریتیلیشی کېنگ کۉلملی مناسبتلرگه سبب بۉلدی و تورلی سیاسي آقیملر اونینگ عاقبتلرینی خواطرلی دېب بهالهماقده.
اوشبو نظامده عیاللر و بالهلرگه نسبتاً زۉرآورلیک فقط آغیر جسماني زۉرآورلیک بیلن چېکلنگن بۉلیب، روحي و جنسي زۉرآورلیک تعقیقلنمهگن.
شونینگدېک، طالبان حنفی مذهبیگه اېرگشووچیلردن تشقری باشقه اسلامي مذهب طرفدارلرینی «بدعتچی» دېب اتب، اجتماعي طبقهلنیش و قوللیکنی قانونيلشتیرگن.
طالباننینگ عدلیه وزیرلیگی مذکور جزایی اصولنامهگه قرهتیلگن تنقیدلرگه جوابن، طالبان قانونلریگه قرشی چیقیش شرعاً جنایت اېکنینی و ناراضیلیک بیلدیرگن شخصلر تعقیب قیلینیشینی معلوم قیلدی.
وزیرلیکنینگ تأکیدلشیچه، طالباننینگ قانونچیلیک حجتلری قرآن، سنت و «حنفی فقهنینگ ایشانچلی منبعلری» اساسیده ایشلب چیقیلگن بۉلیب، اولرگه اعتراض بیلدیریش شریعتگه قرشی چیقیش حسابلنهدی.
