طالبلر مدافعه وزیرلیگی بیانات بېریب، اوشبو وزیرلیکنینگ استراتیژي و سیاست بۉییچه معاونی محمد قاسم فرید باشچیلیگیدهگی هیئت روسیهگه سفر قیلگنی و «مدافعه ساحهسیدهگی همکارلیک» یوزهسیدن مذاکرهلر اۉتکزگنینی تصدیقلهدی.
وزیرلیک ایکس اجتماعي ترماغیده اعلان قیلگن خبریده، اوچرهشووده تامانلر «منطقوي خوفسیزلیک، اۉز ارا همکارلیک و خوفسیزلیککه عاید معمالرنینگ آلدینی آلیش یۉللری»نی هر تامانلهمه بحث قیلگنینی معلوم قیلدی.
طالبان مدافعه وزیرلیگی خبرنامهسیده ایتیشیچه، اولرنینگ هیئتی روسیه مدافعه وزیرلیگینینگ استراتیژي و سیاست بۉییچه معاونی واسیلی اوسماکوف باشچیلیگیدهگی روسیهلیک هیئت بیلن مسکوهده اوچرهشوو اۉتکزگن.
طالبلر معلوماتیگه کۉره، تامانلر اوشبو اوچرهشووده، شونینگدېک، «علاقهلرنی دوام اېتتیریشنینگ اهمیتی، رسمي ملاقاتلرنی کېنگهیتیریش و برقرار همکارلیکنی رواجلنتیریش» مسألهلریگه علیحده اورغو بېرگن.
بوندن آلدین روسیهنینگ انترفکس اخبارات آژانسی مسکوده روسیه و طالباننینگ یوقاری مرتبهلی حربي مسووللری اۉرتهسیده مذاکرهلر بۉلیب اۉتگنینی خبر قیلگن اېدی.
روسیه مدافعه وزیرلیگی تامانیدن چهارشنبه کونی، 8 دلو اعلان قیلینگن بیاناتگه کۉره، اوچرهشووده «ایکّی تامان اوچون مهم بۉلگن ساحهلرده حربي همکارلیکنینگ جاري حالتی و رواجلنیش استقباللری» بحث قیلینگن.
بیاناتده، شونینگدېک، اوچرهشوو یکونیده تامانلر «منتظم و تیزیملی همکارلیکنی یۉلگه قۉییش اوچون قۉشمه قدملرنی دوام اېتتیریش» بارهسیده کېلیشیب آلگنی قید اېتیلگن.
روسیه حاضرگچه طالبان باشقروویدهگی حکومتنی رسماً تن آلگن یگانه دولت حسابلنهدی. متخصصلرنینگ تأکیدلشیچه، روسیهنینگ اساسي خواطری افغانستاندن کېلیب چیقهدیگن خوفسیزلیک تهدیدلر دیر.
روسیه رسميلری، جملهدن اوشبو دولتنینگ بیرلشگن ملتلر تشکیلاتیدهگی نمایندهسی، افغانستانده فعالیت یوریتهیاتگن ترورچی گروهلر، جملهدن داعشدن کېلیب چیقهدیگن تهدیدلر یوزهسیدن بیر نېچه بار تشویش بیلدیرگن و طالبلردن بو گروهلرگه قرشی چارهلر کۉریشنی طلب قیلیب کېلماقده.
