بیرلشگن ملتلر تشکیلاتینینگ معلوم قیلیشیچه، هر اوچ ثانیهده دنیانینگ بیرار جاییده ۱۸ یاشدن کیچیک بیر قیز اویلنهدی.
تشکیلات بوگون (شنبه، ۲۵ دلو) ایکسده بېرگن بیاناتیده باله نکاحی انسان حقوقلرینینگ بوزیلیشی اېکنلیگینی، قیزلرنی اۉزلرینینگ تۉلیق صلاحیتلریگه اېریشیش امکانیتیدن محروم قیلهیاتگنینی تأکیدلهدی.
بیرلشگن ملتلر تشکیلاتی ۱۴ فبروری یاکه سېویشگنلرکونی مناسبتی بیلن باله نکاحلرینی تۉختهتیش تشبثینی قۉللب-قوّتلشگه چقیردی.
افغانستانده باله نکاحی کېنگ ترقهلگن حادثهدیر. حاضرگی وقتده طالبان نینگ چېکلاولری سببلی باله نکاحی افغانستانده آشگنی کۉرینهدی.
بیرلشگن ملتلر تشکیلاتی اهالی صندیغی نینگ ایتیشیچه، باله نکاحی قیزلرنینگ حیاتی و ساغلیغیگه خوف سالهدی و اولرنینگ کېلهجک استقباللرینی چېکلهیدی.
تشکیلاتنینگ معلوماتلریگه کۉره، بالهلیکده نکاحگه مجبور قیلینگن قیزلر کۉپینچه اۉسمیرلیک دوریده حاملهدار بۉلهدیلر و حاملهدارلیک یاکه توغیش اسارتلری خوفی آشهدی، بو اېسه اۉسمیر قیزلر آرهسیده اساسي اۉلیم سببلریدن بیریدیر. شونینگدېک، اولر اۉز تورموش اۉرتاغیدن جسماني یاکه جنسي زۉرآورلیککه اوچرهش احتمالی یوقاری بۉلهدی.
بیرلشگن ملتلر تشکیلاتی اهالی صندیغی آمارلریگه کۉره، دنیا مقیاسیده هر بېش قیزدن بیری ۱۸ یاشگه یېتمسدن رسمي یاکه نارسمي نکاحگه کیرگن.
حاضرده ۶۴۰میلیون قیز و عیال بالهلیکده اویلنگن دېب حسابلنهدی. هر ییلی ۱۲ میلیون اۉسمیر قیز۱۸ یاشگه یېتمسدن تورموشگه چیقهدی.
