عفو بینالمللنینگ معلوم قیلیشیچه، «طالبان محکمهلرینینگ اصولنامهسی» عیاللرگه قرشی زۉرآورلیکنی ینه-ده تیزیملی قیلماقده و اوی ایچیدهگی زۉرآورلیکنی عادتي حال صفتیده کۉرسهتهدی.
حقوقي تحلیلگه کۉره، اوشبو اصولنامه «ناانیق و جوده عمومي توردهگی جنایتلر اوچون جزالر و حکملرنی بېلگیلهیدی، اوی ایچیدهگی زۉرآورلیکنی فقط عیال سویهگی سینگن یاکه کۉزگه کۉرینهدیگن جراحتلر آلگن حاللرده جنایت صفتیده تن آلهدی»
عفو بینالملل جَنوبي آسیا بۉلیمی مدیری اسمریتی سینگ شوندهی دېیدی: «اوشبو اصولنامه الّهقچان سرکوبگرانه بۉلگن حقوقي تیزیمنی ینهده قتّيقراق و شفقتسیزراق قیلهدی. عیاللر و قیزلر شبههسیز اېنگ کۉپ ضرر کۉرووچیلر قطاریده، چونکه اصولنامه اوی ایچیدهگی زۉرآورلیکنی عادتي حال صفتیده قبول قیلهدی و اولرنینگ حرکت اېرکینلیگی و مستقللیگیگه ینه-ده چېکلاولر قۉیهدی»
شونینگدېک، اصولنامه دیني بویروقلرگه رعایه قیلمسلیک اوچون قتّيق جزالر بېلگیلهیدی، پست اجتماعي موقعگه اېگه شخصلرگه آغیرراق جزا تعیینلهیدی و قوللیکنی تن آلهدی.
عفو بینالمللنینگ بیاناتیگه کۉره، اصولنامهنینگ باشقه مادّهلریده مال-ملکنی یۉق قیلیشنی جزا توری صفتیده قبول قیلیش، تن جراحتی و یامان مناسبتنی جسماني جزالر آرقهلی تیزیملشتیریش و اۉلیم جزاسینی کۉپراق جنایتلر اوچون بېلگیلش کۉزده توتیلگن.
جَنوبي آسیا بۉلیمی مسوولی تأکیدلهگن: «دیني قطعي قاعدهلرنی بجریش و جزا درجهسینی اجتماعي طبقهگه قرهب بېلگیلش تبعیضنی مستحکملهیدی و جمعیتنینگ چېکّه قتلملری و اقتصادي جهتدن ضعیف گروهلرینی نشانگه آلهدی»
عفو بینالملل طالباندن اوشبو «اصولنامهنی» درحال بېکار قیلیش یاکه اۉزگرتیریشنی و اونی خلقارا انسان حقوقلری ستندردلریگه ماسلشتیریشنی طلب قیلماقده.
شونینگدېک، تشکیلات گلوبل همجميعتدن اصولنامهنی قطعاً قارهلشنی و طالبان اوستیگه کېنگ و تیزیملی انسان حقوقلری بوزیلیشیگه برهم بېریشنی طلب قیلیشنی سۉرهگن.
طالبان رهبری هبتالله آخوندزاده تخمیناً ایکّی آی آلدین اوشبو «اصولنامه»نی امضالهگن و اونی مملکت بۉیلب محکمهلرگه اجرا اوچون یوبارگن.
اصولنامهنینگ تصدیقلنیشی کېنگ عکسالعمللر و تنقیدلرگه سبب بۉلگن، اما طالبان اونی حنفی فقهنینگ پرینسپلری اساسیده تیارلهگنینی بیلدیرگن.
