مارچ آیینینگ سکّیزینچیسی خلقارا خاتین-قیزلر بیردملیک کونی یېتیب کېلر اېکن ینه بیر بار افغانستانده طالبان تامانیدن جاری اېتیلگن چېکلاولر و باسیملر سبب عیاللر آغیر احوالده اېکنلیگی بیلدیریلماقده.
بیرلشگن ملتلر تشکیلاتینینگ افغانستاندهگی نمایندهلیگی یوناما اوشبو کون مناسبتی بیلن نشر قیلگن حساباتیده، بو مملکتده عیاللر عدالتگه اېریشیشی جوده چېکلنگنینی معلوم قیلدی.
یوناما تامانیدن نشر اېتیلگن معلوماتگه کۉره، حاضر افغانستانده عیاللر، اېرککلرگه نسبتن تۉرت برابر آزراق عدالتگه اېریشهدیلر.
اوشبو حساباتنی بیلدیریشیچه، افغانستانده عیاللر حقلریدن حمایه قیلووچی قضایی تیزیم و تشکیلاتلر بۉلمهگنی سبب اولر عدالتدن اوزاقلشگن.
بیرلشگن ملتلر تشکیلاتی افغانستانده صحبت آلینگن عیاللر یالغیز ۱۴ فایزی اولر اوچون عدالتگه اېریشیش امکانیتی موجودلیگینی تیلگه آلگن حال بو که اوشبو رقم اېرککلرگه ۵۳ فایز دیر.
ایتیش کېرهک که طالبان تۉرت-یریم ییلدن بېری تورلی فرمانلر و چېکلاولر بیلن خاتین-قیزلرنی آغیر احوالگه توشیب قالیشیگه سبب بۉلگن.
