افغانستاننینگ سابق جمهور رییسی حامد کرزی، «خلقارا خاتین-قیزلر کونی» مناسبتی بیلن ینه بیر بار عیاللر و قیزلرنینگ تعلیم و ایشلش حقلرینی تیکلشنی طلب قیلدی.
کرزی بوگون (یکشنبه،۱۷حوت) ایکس اجتماعی ترماغیده نشر قیلگن پیامیده، «مېن افغانستان عیاللرینینگ مملکت ترقیاتی و رواجلنیشی یۉلیده قیلگن تاریخي محنت و کورهشلرینی قدرلشنی ضرور دېب بیلهمن. عیاللر تورلی ساحهلرده، اېرککلر بیلن بیرگه، مملکتنینگ اۉسیش و رواجلنیشیده مهم رۉل و کتّه حصه قۉشگنلر» دېگن.
سابق جمهور رییسنینگ قۉشیمچه قیلیشیچه، «بو کون مناسبتی بیلن و بوگونگی جمعیتنینگ اساسي احتیاجلرینی تأمینلش همده مملکتنینگ کېلهجکدهگی ترقیاتی عیاللرنینگ برچه اجتماعي ساحهلرده اشتراک اېتیشینی طلب قیلهیاتگنینی حسابگه آلگن حالده، ینه بیر بار تأکیدلهیمن: قیزلر اوچون مکتب و بیلیم یورتلری تېزراق آچیلیشی، عیاللرنینگ ایشگه قَیتیشی و جمعیتده فعال اشتراک اېتیشی اوچون شرایط یرهتیلیشی کېرهک»
طالبان افغانستاننی قَیته نظارتگه آلگچ، آلتینچی صنفدن یوقاری قیزلرنی تعلیم آلیشدن منع قیلگن و کېینچهلیک بیلیم یورتی اېشیکلرینی هم عیاللرگه یاپگن.
شونینگدېک، بو گروه عیاللرنی دولت ادارهلریده و محلي همده خلقارا نهادلر جملهدن بیرلشگن ملتلر تشکیلاتی ادارهلریده ایشلشدن هم تعقیقلهگن.
بیرلشگن ملتلر تشکیلاتی متخصصلری طالباننینگ افغانستان عیاللریگه قرشی سیاستینی «انسانیتگه قرشی جنایت» دېب بهالهگن و بو سیاستنی «جنسی آپارتاید» دېب هم اتش ممکنلیگینی بیلدیرگن.
