قندوز ولایتینینگ یورهگیده، ییللر دوامیده اوروش کولنکهسی انسانلر حیاتی اوستیگه توشیب تورگن بیر یېرده، قۉللری بۉش، بیراق یورهگی امیدگه تۉله خاتین-قیزلر بار. اولر ینه-ده یارقین کېلهجک اوچون تینمهی حرکت قیلماقده.
فیروزه انه شوندهی قیزلردن بیری دیر. او اوروش آلاوی آرهسیده هم اۉقیش و تعلیمگه اینتیلگن قیزلردن بۉلیب، بوگون اېسه موجود چېکلاولرگه قرهمهی، اۉزینینگ جیم قالگن سېسینی محنت و حرکت بیلن بلند قیلگن و کېلهجگینی اۉزگرتیریشگه حرکت قیلماقده.
قندوز شهریدن بۉلگن 27 یاشلی فیروزه حیاتینینگ آغیر و قرانغو کونلری حقیده سۉزلب بېرهدی.
فیروز شوندهی دېدی: “مېن طالباننینگ بیرینچی حاکمیتی دوریده اوچ یاشده اېدیم. اۉشه پیتلرده اوروش هم، چېکلاولر هم جوده کۉپ اېدی.”
آلتی یاشگه تۉلگنیمده اېسه مکتبگه باره آلمهدیم، چونکه خاتین-قیزلرگه مکتبگه باریشگه رخصت یۉق اېدی.
شو چېکلاولر بیلن ییللر اۉتدی. اوزاق دوام اېتگن اوروشلر و قرانغو کونلردن کېین اېسه جمهوری تیزیم باشلندی.”
فیروزه جمهوریت دوریده 8 یاشیده مکتبگه باره باشلهدی. بیراق، بو اونینگ اوچون بختلی باشلنیشی اېمس اېدی.
فیروزه و مکتبگه بارهیاتگن هر بیر باله گویا اۉز جانینی قۉلیده کۉترگندیک اېدی. قندوزده دېیرلی هر کونی اوروش بۉلردی پارتلش و اۉزجانیگه قصد قیلیش هجوملر یوز بېرردی. اولرنینگ قولاقلری قورال و اۉق تاووشلریگه اۉرگنیب قالگن. یورهکلری اېسه قۉرقو و امیدسیزلیک بیلن تۉلگن اېدی.
فیروزه باشقه اۉقووچیلر، بو دهشتلی منظرهنی اۉز کۉزلری بیلن کۉریشدی و قۉرقوو اولرنینگ بوتون وجودینی قمرب آلدی. شو واقعهدن کېین کۉپلب اۉقووچیلر اېندی مکتبگه باریشگه جرات قیلهآلمهدیلر.
فیروزه شوندهی ایتهدی: ” مېن مکتبنینگ 8 صنفیده اۉقیردیم. شو قدر کۉپ قیینچیلیک و بحرانلردن کېین عینا اۉشه ییلی مکتبگه جوده قیزیق قیزیق باشلهگن اېدیم. برچه قۉرقوولریمنی آرتده قالدیریب، ینه مکتبگه قتنهی باشلهگندیم.“
بیراق، اۉشه کونی مېن کۉرگن منظره مېنی قتیق تیتراقگه سالدی. حتی اوزاق وقت سۉزلشهآلمهدیم. بیر آی دوامیده مکتبگه بارمهدیم. حتی کیمدیر “مکتب” دېگنیده، کۉز اۉنگیمده قان ایچیده یاتگن جسدلر مجسم بۉلر اېدی.
بو قۉرقوونی اونوتیش ،اونی آرتده قالدیریب ینه دوام اېتیش آسان اېمس اېدی. بیراق، مېن دوام اېتیشیم کېرهک اېدی، ینه-ده جسورراق بۉلیب.
آته-آنم مېنی جوده کۉپ روحلنتیردیلر و قۉللب-قۉتلهدیلر. اولرنینگ حمایهلری و امیدلریگه تهیهنیب، مېن ینه مکتبگه باریشنی باشلهدیم.”
فیروزه، صنفداشلری و تېنگداشلرینینگ برچهسی ینه مکتبگه قیتیب، جسارت بیلن اۉز درسلرینی دوام اېتیردیلر.
فیروزه مینگلب قیزلردن بیریدیر که، او حتی اېنگ آغیر و اېنگ خوفلی دورلرده هم تعلیمدن یوز اوگیرمهگن. اوروش آلاوی آرهسیده مکتبنی تماملهگن و کېینچهلیک بیلیم یورتده حقوق و سیاسی فنلر بۉییچه تحصیلینی دوام اېتیرگن.
فیروزه شوندهی دیدی:”مېن مکتب دوریده هم ایشلردیم. بیر خصوصی مکتبده بالهلرگه درس بېریب، اۉز خرجتلرینمنی تامینلب تورردیم.”
شونینگدېک، مېن یازووچیلیککه جوده قیزیقردیم. بۉش وقتیمده رومان یاکه الهاملنتیرووچی عبارهلرن یازردیم.”
فیروزه بیلیم یورتی دوریده یازووچیلیکنی باشلهدی.
او اوچ ییل ایچیده ایکّی سیاسی کتاب و بیر الهاملنتیروچی کتاب یازگن اېدی. بیراق، یېترلی مبلغ یۉقلیگی سببلی کتابلری باسیمدن چیقمهدی. فیروزهگه بو یۉنهلیشده هېچ قندهی قۉللب-قوتلش کۉرستیلمهدی.
بو بیلم یورتیدهگی آخرگی ییلیده هم اوروش سېسی تۉلیق تینچلنمهگن اېدی. اوروش آلاوی کوچهیدی و جمهوریت حکومتی قوللب توشدی.
فیروزه: ” بو مېنینگ سۉنگگی ییلریم اېدی. هر کونی مقصدلریمنی رېجهلشتیرردیم. آرزو و امیدلریم حقیده اۉیلردیم. بیلیم یورتینی تماملهگنیمده یخشی ایش تاپیب، درآمد تاپیشنی، شونده اۉزیم و عایلهم خرجتلرینی تامینلشنی ایستردیم.“
چونکه مېنینگ عایلهم اوروش معمالری بیلن بیرگه اقتصادی قیینچیلیکلر بیلن هم کورشر اېدی.” دېب ایتهدی. “طالباننینگ تۉلیق حاکمیتیگه کېلیشیدن سۉنگ اوروش توگهدی. تینچلیک و خوفسیزلیک اۉرنهتیلدی. بیراق، فیروزه بیلمس اېدی: تینچلیک و خوفسیزلیکنینگ نرخی اولرنینگ اېرکینلیگی بۉلیشینی. “
مکتب اېشیکلر یاپیلدی. بیلم یورتلریگه رخصت بېریلمهدی. ایشلهیاتگن خاتین-قیزلر اۉ ایشلریدن بۉشهتیلدی و اولرگه هرکون ینگی چېکلاولر جاری قیلیندی.
فیروزه سۉزلرینینگ دوامیده شوندهی ایتهدی: “مېن اېندی بیلیم یورتیگه باره آلمهدیم. ایکّی ییل هېچ نرسه قیلمهی، فقط توشکونلیککه توشگن اېدیم. شو ایکّی ییل قیغو و جگرخونلیک بیلن اۉتکزدیم.“
هر کونی درسلریم و آرزو اېسیمگه کېلردی. باشقه تاماندن، کمبغللیک و ایشسیزلیک مېنی بېزاته قیلردی. بیراق، بو ییغلشلر هېچ قندهی فایده بېرمسدی. آته-آنهم هم بو حالتدن خفه بۉلیشیردی.
اۉشه کونلردن سۉنگ مېن اۉزیمگه وعده قیلدیم: ییغلهمیمن، کوچلی بۉلهمن، امیدسیز بۉلمهیمن و ینه اۉزیمنینگ ایاقلریم اوستیده تورهمن.”
فیروزه نهایت بیر ایش باشلهشگه قرار قیلدی.
او آشپزلیکنی جوده یخشی بیلگنلیگی سببلی، خاتین-قیزلر اوچون اۉزیگه خاص رستورانت آچیشگه قرار قیلدی.
فیروزه اۉز اۉرتاغی زینب بیلن شریک بۉلدی و بیرگه خاتین-قیزلر اوچون مخصوص رستورانت تشکیل اېتدیلر. اولرنینگ اماجی؛ خاتین-قیزلر بی ملال و اېرککلر تشویشیسیز آوقتلرلنیشلری، اۉز درامدلرینی تاپیشلری و اۉقیشدن چېتده قالگن قیزلر اوچون ایش امکانیتنی یرهتیشدن عبارت اېدی.
بوگونگی کونده بو رستورانت نهفقط فیروزه و زینبگه درآمد کېلتیرهدی، بلکه ینه 7 کیشی قیز اوچون ایش امکانیتنی یرهتیب، اولر هم درآمد تاپیشماقده.
فیروزه و زینب شوندهی دېدی: “ایلک فقط تیریک قالشنی ایستیر اېدیک، حاضر اېسه یشهماق استهیمیز.”
مدنی چېکلاولر، کمبغللیک و امکانیتلر نینگ یېتیشماوچیلیگیگه قرهمهی، بو عیاللر تسلیم بۉلمهی، بیللرینی باغلب، رستورانت ایشنی کوچ بیلن یوریتماقدهلر.
اولر آته-آنهلریدن آزگینه حمایده آلهدیلر، بیراق اېنگ کتّه قۉللب-قوتلش و ماتیواتسیه اولرنینگ ایچیدن کېلهدی. اۉزلری اوچون آرزو قیلگن حیاتدن و یورهکلریده اۉز اۉسیب-اونهیاتگن امیدلریدن.
اېندی قندوز فقط اوروش کۉرگن ولایت آتی اېمس. بلکه، کوللر ایچیدن تورگن و حیات چراغینی قیتهدن یاقگن خاتین-قیزلرنینگ رمزی دیر.
