افغانستاننینگ بیرلشگن ملتلر تشکیلاتیدهگی نمایندهسی نصیراحمد فایق، طالباننینگ افغانستان اوستیدن قَیته نظارتگه کېلگنیگه بېشینچی ییل یقینلشر اېکن، خلقارا همجعميت اوچون انیق بۉلیب قالگنینی ایتدی. بو گروه شو وقت ایچیده افغانستان خلقی احتیاجلری و حقیقتلری بیلن معامله قیلیش، اۉزگریش و موازنت یۉلیده هېچ قندهی مضمونلی قدم قۉیمهدی.
فایق بیرلشگن ملتلر تشکیلاتی خوفسیزلیک کېنگشیدهگی افغانستان بۉییچه مجلسده، عکسینچه، طالبان سیاستی کوندن-کونگه «قتّيقراق و باستیرووچی» بۉلیب بارماقده دېدی.
اونینگ قۉشیمچه قیلیشیچه، افغانستان طالباننینگ باستیریش و قۉرقوو سیاستلری طفیلی چوقور انسانپرورلیک، سیاسي، اجتماعي و اقتصادي بحران بیلن یوزلشماقده.
فایق عیاللر و قیزلرگه قرشی طالبان سیاستیگه اعتبار قرهتیب شوندهی دېدی: «عیاللر و قیزلر عملده جماعت حیاتیدن چیقریب تشلنگن، فقرالیک میدانی بوزیلگن، اقتصادي جدّي ضرر کۉرگن و بیر اولاد تۉلیق تعلیم حقوقی و امکانیتیدن محروم قیلینگن.»
او بولرنی طالباننینگ تصادفي عاقبتلری اېمس، بلکه اولر تامانیدن مقصدلی عملگه آشیریلگن سیاستنینگ کوتیلگن نتیجهسی اېکنینی تأکیدلهدی.
نصیر احمد فایق طالبان بیلن «عملي معامله» دېب اتلهدیگن یاندشوونی تنقید قیلدی و بوندهی یاندشوو تینچلیک، برقرارلیک و فراوانلیککه آلیب کېلمسلیگینی ایتدی.
او بیرلشگن ملتلر تشکیلاتی یېتکچیلیگیده ینگی ملاقات باشلنیشی، افغانستان خلقی ایستهگی و ارادهسیگه اساسلنگن قانوني و کېنگ قمراولی سیاسي ترتیب شکللنیشینی تأمینلشنی طلب قیلدی.
شونینگدېک نصیراحمد فایق بیرلشگن ملتلر تشکیلاتی خوفسیزلیک کېنگشیدن پاکستاننینگ افغانستان توپراغلریگه و تینچ اهالی ساختارلریگه بۉلگن هجوملرینی تۉختهتیشینی سۉرهدی.
اونینگ قۉشیمچه قیلیشیچه، طالبان افغانستان خلقینی وکیللیک قیلمهیدی، و بو گروهنینگ سیاستیدن کېلیب چیقهدیگن زۉرآورلیک، جملهدن ترورچیلیک گروهلریگه باشپناه بېریش، هم خلقنینگ ارادهسینی عکس اېتتیرمهیدی.
