پاکستان تشقی ایشلر وزیرلیگی هندستاننینگ افغانستاندهگی هوا هجوملریگه مناسبتینی «اساسسیز، حقسیز و اویتسیز طرزده ایکّی یوزلمهچیلیک» دېب بهالهدی.
پاکستان تشقی ایشلر وزیرلیگی سۉزلاوچیسی طاهر اندرابی، «هندستاننینگ افغانستان توپراغیده فعالیت یوریتهیاتگن ترورچی گروهلرنی، جملهدن فتنهالخوارج و فتنهالهندوستان فعال قۉللب-قوّتلشی یخشی معلوم دېب تیلگه آلگن.»
اونینگ قۉشیمچه قیلیشیچه، «شونینگ اوچون هندستاننینگ افغانستاندهگی اۉزیگه قرهشلی ترور ترماغی یۉق قیلینیشیدن ناراضی بۉلیشی، بو کبی بیاناتلرده عکس اېتگنیدېک، تۉلیق توشونرلی.»
پاکستان « فتنهالخوارج» اتَمهسینی اۉز مملکتیدهگی تحریک طالبان پاکستان (تیتیپی) اوچون و «فتنهالهندوستان» اتَمهسینی بلوچستان آزادلیک حرکتی اوچون ایشلهتهدی.
هندستان تشقی ایشلر وزیرلیگی تیناوون کېچقورون پاکستاننینگ افغانستان توپراغیدهگی هوا هجوملرینی، بو هجوملر بیر قنچه تینچ اهالینی اۉلدیرگنی و تینچ انشااتلرنی ویران قیلگنی سببلی، قارهلهدی.
هندستان تشقی ایشلر وزیرلیگی سۉزلاوچیسی راندهیر جیسوال، «بو پاکستان ادارهلری تامانیدن ینه بیر تجاوزکار حرکت بۉلیب، اولر مستقل افغانستان غایهسیگه قرشی دایما دشمنلیک قیلماقده» دېگن.
طالبان معلوماتیگه کۉره، پاکستان پنجشنبه آقشامیده ینه کابل، قندهار، پکتیا و پکتیکا ولایتلریده مقصدلرنی بامباردمان قیلگن.
طالباننینگ ایتیشیچه، کابلده بیر اوی مقصد قیلیب آلینگن و اونده تۉرت تینچ اهالی هلاک بۉلگن، ینه 14 کیشی جراحتلنگن.
شونینگدېک، گروهنینگ ایتیشیچه، پاکستان قندهارده کام ایر شرکتیگه تېگیشلی نفت انبارینی نشانگه آلگن.
پاکستان اېسه «افغانستاندهگی ترور تشکیلاتلری انشااتلری»نی نشانگه آلگنینی و نفت انباری طالبان ملکی بۉلگنینی ادعا قیلگن.
