یقینده بیرلشگن ملتلر تشکیلاتینینگ خوفسیزلیک کېنگشی طالباننینگ ۲۲ کیشیلیک ییریک مقاملری بو تشکیلات تحریمی آستیده بۉلگنینی قیته اعلام قیلدی. شو بیلن بیرگه بریتانیا حکومتی هم طالبان اعضالری بو مملکت تحریمی آستیده اېکنینی قیته اعلام قیلگن.
افغانستان انسان حقلری فعاللری بیرلشمهسی بیر بیانات نشر قیلیب، بیرلشگن ملتلر تشکیلاتی خوفسیزلیک کېنگشی و بریتانیانینگ اوشبو قرارینی خوش قرشیلهگن.
اوشبو بیرلشمهنینگ تاکیدلشیچه، مذکور قرار طالباننینگ ترورچیلیک کۉرینیشینی ینه بیربار آچیقلهگن.
عینی حالده، افغانستان انسان حقلری بیرلشمهسی، طالبانگه قرشی بو حرکتنی یېترلی بیلمهی، بو گروهگه قرشی کۉپراق باسیملر ایشلهتیلیشینی اورغولهگن.
اوشبو بیرلشمه بیاناتیده طالبان تامانیدن عملگه آشیریلیب تورگن زورهوانلیکلر و انسان حقلری بوزیلیشی اېسلهنیب، خلقارا همجمعیتی یالغیز طالبان یاندهشوولری اوزگریشی ییچیم یۉل اېمسلیگی و بو حاکمیت یکونلنیشی اساسی چاره اېکنلیگینی بیلیشی کېرهک دېب تاکیدلهنگن.
بیاناتده، طالبان حاضر افغانستانده جنسی آپارتاید و فرهنگی جینوسایدگه قۉل اوریب تورگنی معلوم قیلینگن.
عینی حالده، انسان حقلری فعاللر اۉز بیاناتیده، طالباندن کیین قندهی تیزیم اۉرتهگه کېلیشی خصوصیده اعتبار قرهتیلیشی همده طالبان رهبرلری خلقارا محکمهلرده جوابگرلیککه تارتیلشی و اولرنینگ مالی منبعلری تاپیلیب و باغلنیشینی هم تکلیف قیلگن.
