کانادانینگ تورنتو شهریده یشاوچی اۉزبېک فعاللر طنطنهلی بیر ییغین اۉتکزیب، رمضان هییتی و ینگی ییل بیرهمینی نشانلهدیلر.
توران اجتماعی و خذمت کۉرسهتیش انجمنی تشبثی بیلن اۉتکزیلگن بو احتفالده، فعاللر، عیاللر، یاش-ییگیتلر و آقسقاللر کینگ اشتراک اېتگن.
اوشبو احتفالده نطق سۉزلهگن فعاللر، نوروز و هییت بیرهملرینینگ خلقمیز آرهسیدهگی اهمیتی، افغانستانده دوام اېتهیاتگن وضعیت، خاتین-قیزلر احوالی و بیرلیک و بیردملیک حقیده صحبت قیلدیلر.
سابق سیاسی سیمالردن سردارمحمد رحمان اۉغلی بو احتفالده، نوروز بیرهمی فلسفهسی حقیده نطق سۉزلب، بو ییل خلقمیز اوچون یخشی و ایجابی اوزگریشلر اۉرتهگه کېلیشیگه امید بیلدیردی.
سابق حکومت دوریده، نمایندهلر کېنگشینینگ اعضاسی حلیمه صدف هم بیرلیک و بیردملیک همده خاتین-قیزلر احوالی حقیده صحبت قیلگن.
شونینگدېک، توران اجتماعی و خذمت کۉرسهتیش انجمنینینگ باشلیغی صدیق عابدی اېسه، اۉز نطقلریده بو کبی ییغینلر اهمیتی حقیده علیحده تۉختهلیب اۉتگن.
ایتیش کېرهک که هییت و نوروز بیرهملری اوزاق ییللردن بیری خلقمیز آرهسیده طنطنهلی نشانلهنیب کېلهیاتگن مناسبتلردن دیر. بیراق طالبان حاکمیتگه قیتگنیدن بیری افغانستانده نوروز بیرهمی نشانلهنیشی برابریده چیکلاو یرهتیلگن.
