اۉتگن کونی اندخوی شهریده یوز بېرگن اۉغیرلیک واقعه طالبان حاکمیتیدهگی خوفسیزلیک حقیده کۉپلب تنقیدلر و سواللرنی اۉرتهگه آلیب کېلگن.
اوشبو واقعهدن اۉزبېک تیوی گه یوباریلگن ویدیوده، واقعه اۉتگن کون دوشنبه ۳- حمل توشدن کېین ۱۴:۰۲ دقیقهده یوز بېرگن.
واقعهده طالبان عسکرلرینینگ یونیفورمیده بۉلگن تۉرت کیشی قوراللنگن حالده، زرگرلیک دوکانیگه کېریب، بو دوکاننینگ ایکّی ایگهسینی اۉققه توتیب اۉلدیرهدی و ودوکاندهگی قیمتبها تقینچاقلرنی اۉزلری بیلن آلیب کېتهدی.
واقعهده اندخویلیک ایکّی ایناغه بۉلمیش حاجی خال محمد و حاجی محمدنبی ناملی زرگرلیک بیلن شغللنگن کیشیلر جان بېرگن.
واقعه یوز بېریشی آرتیدن و بو واقعهدن ترقهتیلگن ویدیولر کۉریلیشی بیلن اهالی طالباننینگ خوفسیزلیک شعارلرینی تنقید آستیگه آلماقده دیر.
اندخوی یشاوچیلرینینگ ایتیشیچه، واقعه کابل بانک و برشنا برق یېتکزیش شرکتی نمایندهلیکلری یقینیده یوز بېرگن شو سبب واقعه یوز بېرگن مکانده طالبان حربیلری حضوری بۉلگن بیراق طالبان اېسه بو خصوصده بیفرق قالگن.
شونینگدېک اهالی کوندوز یاورقلیگیده قوراللی شخصلر شهر ایچیگه کېلیب، آدملرنی اۉلدیریب کېتیشی بو واقعه طالبان تامانیدن یا ده بو گروه خوفسیزلیک کوچلری همکارلیگیده بجریلگنینی انیقلهیدی دېب هم اورغولهماقدهلر.
ایتیش کېرهک که بوندن ایلگری هم ایریم منطقهلرده طالبان اعضالری اۉغیرلیکلرده قۉلی بارلیگی حقیده خبرلر نشر اېتیلگن اېدی بیراق بو واقعه کمرهده آلینگن ویدیو و طالبان عسکرلری یونیفورمیده بۉلگن اۉغریلر بو گروهنینگ قۉلی بارلیگی حقیده ایشانچلرنی اۉرتهگه آلیب کېلگن.
اوشبو واقعه شوندهی بیرحالده یوز بېرماقده دیر که اخیرگی وقتلرده افغانستان تورلی حدودلری اینیقسه اۉزبېکلر یشاوچی حدودلرده اۉغیرلیک واقعهلری کۉپهیگن.
