بیرلشگن ملتلر تشکیلاتی کارشنانلری طالبان و پاکستاندن «دایمي اۉت آچیشنی تۉختهتیش»گه صادق قالیشنی، ماجرانینگ ایلدیز سببلرینی حل قیلیشنی و خلق ارا قانون بوزیلیشلری بۉییچه جوابگرلیکنی تأمینلشنی سۉرهگن.
اولر بیانات چیقریب، شونینگدېک پاکستان نینگ کابلدهگی مخدرماده گه بېریلگنلرنی دوالش مرکزیگه قیلگن هجومینی قارهلهگن و قربانلر عایلهلری بیلن همدردلیک بیلدیرگن.
بیاناتده ایتیلیشیچه، طالبان و پاکستان اۉرتهسیدهگی ماجرا ۲۶-فبروریدن باشلب دوام اېتیب، شو وقت ایچیده افغانستانده۲۸۹ کیشی هلاک بۉلگن یاکه جراحت آلگن. نا حربی تاسیساتلر جملهدن طبیات مرکزلری، اویلر، بازارلر و یشش جایلری ضرر کۉرگن، مکتبلر و چېگره اۉتیش بندرلری یاپیلگن، سودا اېسه تۉختهب قالگن.
بیرلشگن ملتلر تشکیلاتی مختصصلری، شونینگدېک طالبان تامانیدن پاکستان حدودیده عملگه آشیریلگن هجوملر نتیجهسیدهگی تینچ اهالی تلفاتلری، آدملرنینگ کۉچیشی و مکتبلر یاپیلیشیدن هم خواطر بیلدیرگن.
اولر هر ایکّی تاماندن خلقارا حقوق و خلقارا گومانیتر حقوققه رعایه قیلیشنی، تینچ اهالی هدفلرنی حمایه قیلیشنی، برچه دعوا قیلینگن حقوقبوزرلیکلر بۉییچه تېزکار، مستقل و شفّاف تېرگاو اۉتکزیشنی، عیبدارلرنی جوابگرلیککه تارتیشنی و جبرلنگنلرگه تاوان بېریشنی طلب قیلگن.
متخصصلر تحریک طالبان پاکستان مسألهسیگه اشاره قیلیب، برچه تامانلر، جملهدن طالبان هم، ترورچی گروهلر انسان حیاتیگه تهدید سالیشی نینگ آلدینی آلیش اوچون جدّي چارهلر کۉریشی کېرهکلیگینی تأکیدلهگن.
اولرنینگ فکریچه، خلق ارا حقوققه کۉره هېچ بیر دولت اۉز توپراغیدن باشقه دولتگه قرشی ترورچیلیک فعالیتیگه رخصت بېرمسلیگی کېرهک، چونکه بو ناقانوني کوچ ایشلهتیش یاکه ارهلشوو صفتیده بهالنیشی ممکن.
بیرلشگن ملتلر تشکیلاتی کارشناسرلری، شونینگدېک، پاکستاننینگ افغانستانگه قیلگن هجوملرینی بیرلشگن ملتلر تشکیلاتی نظامی نینگ ۲-مادّهسی و خلق ارا عادت حقوقی بۉییچه کوچ ایشلهتیشنی تعقیقلشنی بوزیش دېب بهالهگن.
اولر «اۉزینی حمایه قیلیش حقوقی» فقط طالبان اوّل پاکستانگه هجوم قیلگن یاکه تحریک طالبان پاکستاننی هجوم اوچون یوبارگن حالتدهگینه عمل قیلیشینی تأکیدلهگن.
اولرگه کۉره، پاکستان طالبان نظارتی یاکه یۉنهلیشی آستیده تحریک طالبان پاکستان هجوملری عملگه آشیریلگنینی اثباتلهیدیگن ایشانچلی دلیللرنی تقدیم اېتمهگن.
اولر، شونینگدېک، خلقارا محکمه فقط قوراللی گروهلرنینگ موجودلیگی باشقه دولتگه اتوماتیک روشده اۉزینی حمایه قیلیش حقوقینی بېرمسلیگینی تصدیقلهگنینی اېسلهتگن و پاکستان بیرلشگن ملتلر تشکیلاتی خوفسیزلیک کېنگشیگه اۉز دعواسینی رسمي بیلدیرمهگنینی قید اېتگن.
متخصصلر «ناقانوني کوچ ایشلهتیش» نتیجهسیده پاکستان هجوملریده هلاک بۉلگنلرنینگ یشش حقوقی بوزیلگنینی ایتگن. اَیریم هجوملر اېسه خلقارا انسان پرورلیک حقوقنی بوزگن بۉلیشی ممکنلیگی هم قید اېتیلگن.
اولر دولتلر تروریزم تهدیدیگه قرشی اۉز خلقینی حمایه قیلیشگه مجبور، اما بونی فقط خلقارا حقوق دایرهسیده عملگه آشیریشی کېرهکلیگینی تأکیدلهگن.
متخصصلر نزاعلر خلقارا خوفسیزلیکنی خوف آستیگه قۉیسه، اولرنی فقط تینچ یۉللر بیلن حل قیلیش کېرهکلیگینی اېسلهتگن.
ماجرا تخمیناً اوچ هفتهدن بېری دوام اېتیب کېلماقده. بو دورده پاکستان افغانستاننینگ تورلی حدودلرینی هوا و راکت ضربهلری بیلن نشانگه آلگن، طالبان اېسه پاکستان چېگره پُستهلریگه هجوملر اویوشتیریب، درونلر آرقهلی اَیریم نشانلرنی اورگن.
ایکّی تامان هم هییت مناسبتی بیلن سعوديه عربستانی، قطر و تورکيهنینگ چقیریغیگه بناءً وقتینچهلیک اۉت آچیشنی تۉختهتیش اعلان قیلگن.
بو صلح دوشنبه یریم تونده توگهگن، بیراق حاضرچه ینگی تۉقنهشوولر حقیده خبر بېریلمهگن.
