ماینلرگه قرشی حرکت خلقارا کونی مناسبتی بیلن افغانستانده، خلقارا تشکیلاتلرنینگ خبر بېریشیچه، افغانستانده هلی هم سابق اوروشلردن قالگن ماین همده اۉق-داریلر کېنگ کۉلمده اهالیدن قربانلیک آلماقده.
بیرلشگن ملتلر تشکیلاتینینگ افغانستاندهگی نمایندهلیگی یا ده یوناما اوشبو ماینلر همده اۉق-داریلر پارتلشی عاقبتیده هر آیده ۵۰ کیشی جان بېریشینی معلوم قیلگن.
یوناما بو حقده، بوگون شنبه ۱۵ – حمل نشر قیلگن حساباتیده معلومات بېردی.
شو بیلن بیرگه یوناما، افغانستان دنیا بۉیلب اوروشلردن قالگن ماین و حربی جهازلرنینگ پارتلشی عاقبتیده قربانلیکلر گواهی بۉلگن اوچینچی مملکت دېب اعلام قیلگن.
عینی حالده، خلقارا قیزیل خاچ کمیتهسی هم ماینلر و اۉق-داریلر پارتلشی عاقبتیده افغانستانده یوزلب کیشی اۉلیب و یرهلنگنینی اعلام قیلدی.
بو کمیته حساباتیگه کۉره، اۉتگن ییل دوامیده افغانستانده ۲۱۷ واقعه یوز بېریب، ۹۲ کیشی جان بېرگن و ۳۷۵ کیشی یرهلنگن.
واقعه قربانلرینینگ کۉپینچهسی هم بالهلر بۉلگنی قید اېتیلگن.
