طالبلرنینگ میدان وردک و ننگرهار ولایتلریدهگی محلي مسووللرینینگ خبر بېریشیچه، اوشبو ولایتلرده اوی تاملری قولب توشیشی عاقبتیده کمیده۹ کیشی، جملهدن عیاللر و بالهلر جان بېرگن، ینه۹کیشی یرهلنگن.
میدان وردکدهگی طالبلر خوفسیزلیک باشقرمهسی معلوم قیلیشیچه، تیناوون (یکشنبه، ۱۶حمل) کوچلی یامغیر یاغیشی نتیجهسیده جغتو اولسوالیلگیده بیر اوی نینگ تامی قولب، بیر عیال و ایکّی باله نینگ عمریگه ضامن بۉلگن، ینه ایکّی کیشی جراحت آلگن.
شو بیلن بیرگه، ننگرهار ولایتیدهگی طالبان حاکمی ادارهسی بیلدیرگنیدېک، پچیراگام، خوگیانی و سپین غر اولسواللیکلریده اوی تاملرینینگ قولهشیدن۶ کیشی هلاک بۉلگن و۷ کیشی جراحتلنگن.
بیاناتگه کۉره، بوگون (دوشنبه، ۱۷-حمل) تونگی ساعت چمه سی ۲:۰۰ ده پچیراگام اولسواللیگینینگ «موسی خېل» منطقهسیده بیر اوینینگ تامی قولهب۳ باله هلاک بۉلگن، ینه 3 کیشی جراحتلنگن.
شونینگدېک، کېچه خوگیانی اولسواللیگینینگ احمدخیل منطقهسیده ینه بیر اوی تامینینگ قولهشیدن۳ باله هلاک بۉلیب، بیر باله جراحتلنگن.
بوندن تشقری، سپینغر اولسواللیگیده هم ینه بیر اوی تامی قولب،۳ کیشی جراحت آلگنی ایتیلگن.
سۉنگگی اۉن کون ایچیده مملکتنینگ تورلی ولایتلریده کوچلی یامغیر یاغیشی و سوو تاشقینلری کوزهتیلماقده.
طالبلر معلوماتلریگه کۉره، سۉنگگی کونلردهگی یامغیرلر و بیر نېچه کېچه آلدین یوز بېرگن زلزله بیلن باغلیق حادثهلر عاقبتیده کمیده ۹۹کیشی هلاک بۉلگن، ینه۱۵۴کیشی جراحتلنگن.
