کابل بیلیم یورتیده طالبلر عالی تحصیلات وزیری ندامحمد ندیمنینگ اۉزبېک تاقّیسی و اۉزبېک محصلی بیلن یاندهشوویگه نسبتن مناسبتلر هلی هم دوام اېتماقده.
فعاللرنینگ ایشانچیگه کۉره، بو حرکت عادی بیر انساننینگ معاملهسی بۉلمهی بلکه طالبان تامانیدن بجریلیب تورگن، اۉزبېک مدنیتیگه قرشی کتّه بیر حرکت دوامی دیر.
ژورنالیست و فعاللردن کنشکا تورکستانی بوحقده بۉلگن مناسبتیده، بو حرکت قنچهلیک کېنگ اېکنلیگی حقیده تۉختهلیب شوندهی دېب یازگن: «اۉزبېکلرگه منسوب بۉلگن دۉپّیگه بۉلگن قرشیلیک اېسه، بویوک بیر خلقنینگ مدنیتگه قرشی یۉلگه قۉییلگن کتّه حرکت دیر.»
جناب تورکستانی، اخیرگی ییللرده مزارشریفده نوایی هیکلی یۉق اېتیلیشی و بیلیم یورتلر لوحهلریدن اۉزبېکچه یازوولری توشیریلیشیدن اېسلب، شوندهی یازگن: «بلخ مرکزی بۉلگن مزار شریف شهریدهگی امیر علیشیر نوایی هیکلی بۉزیلیشی، اۉزبېکچه یازولرنی عالی اۉقو یورتلر لوحهلریدن آلیب تشلهنیشی کبی حرکتلر اېسه، خلقنینگ تیل و مدنیتیگه بۉلگن جدی قرشیلیک دیر. بو اېسه عادی بیر مناسبت اېمس، کېلهجگده یۉلگه قۉیلیشیممکن بۉلگن سیاستلرنی ایلدیزیدن قیناقلنهدی.»
شونینگدېک، بوندن تشقری باشقه فعاللر هم طالبان حاکمیتیده اۉزبېک تیلی و مدنیتی احوالیدن خواطر بیلدیرماقده دیر. اولرنینگ فکریچه، طالبان اۉزبېک تیلی و مدنیتی بیلن ضدیتده حرکت قیلماقده و بو اېسه مدنیتگه ارزش بېریلیش مقصدیده بۉلگن حرکتلرنی باستیریش یۉللرینی آرقهلی دوام اېتماقده.
