افغانستانده اروپا اتفاقی نمایندهلیگی بیر بیانات نشر قیلیب، بو اتفاقنینگ افغانستان بۉییچه مخصوص وکیلی ژیل برتران کابلدهگی سفری دوامیده، طالبان رسمیلری بیلن تورلی مسالهلر اینیقسه ترورچی گروهلر فعالیتی، طالبان و پاکستان تۉقنهشوولری و عیاللر حقلری خصوصیده صحبتلشگنینی اعلام قیلدی.
اروپا اتفاقینینگ یازیشیچه، بو اوچرهشوولرده، افغانستانده ترورچی گروهلر فعالیتی و بو گروهلرنینگ پاکستانگه قرشی هجوملری یکونلنیشینی طلب قیلگن.
شونینگدېک، اروپا اتفاقی وکیلی طالبان و پاکستان اۉرتهسیدهگی کیسکینلیکلر سۉزلهشوولر آرقهلی حل اېتیلیشینی تاکیدلب، بوباره تورکیه، سعودی عربستان، قطر و چین مملکتلری سعی و حرکتلریدن قدرلهگن.
عینی حالده، اروپا اتفاقینینگ وکیلی افغانستانده عیاللر احوالی و اولرگه نسبتن چیکلاولر عاقبتلری حقیده صحبتلشیب، افغانستان جماعهسی بو چیکلاولر عاقبتیدن آگاهلنتیرگن.
بونگه قوشیمچه، اروپا اتفاقینینگ وکیلی بو اتفاقنینگ افغانستان اوچون بۉلگن انسانپرورلیک یاردملری، بو یاردملر عیاللرگه هم یېتیشیشی ضرورلیگی و یاردملر ترقهتیلیشی جریانیده عیاللر اشتراکینی تاکیدلهگن.
ایتیش کېرهک که اۉتگن کون طالبان تشقی ایشلر وزیرلیگی بیر بیانات ترقهتیب، بو گروهنینگ تشقی ایشلر وزیرلیگی اۉرین باسری محمدنعیم و ژیل برتران اۉرتهسیده اۉتکزیلگن اوچرهشوودن خبر بېرگن اېدی.
طالبان تشقی ایشلر وزیرلیگی بیاناتیده، عیاللر حقلری احوالی، ترورچی گروهلر فعالیتی و طالبان و پاکستان تارتیشوولری حقیده گپیریلگندن بیران نرسه دېیلمهگن.
