قزاقستان ۲۳ اپریلنی “ملی کتاب کونی” و “کتاب اۉقووچیلر کونی” صفتیده نشانلهدی. بو تشبث قاسم جومرت توقایف تمانیدن ایلگری سوریلگن. قازین فورم آژانسینینگ خبریگه کۉره، ممکلت بۉیلب کېنگ کۉلملی مدنی تدبیرلر تشکیل اېتیلدی.
مدنیت و اخبارات وزیرلری آیدا بالایوانینگ ایتیشیچه، قزاقستانده 12 مینگگه یقین کتابخانه و 20 مینگگه یقین متخصص فعالیت یوریتماقده. کتابلر هنوز بیلیم و شخصی رواجلنیش ننیگ مهم قیناغی سنهلهدی.
سۉنگگی ییللرده کتابخانهلر دیجیتال تیزیملری آرقهلی یوکسلیب بارماقده. آنلاین کتابخانه فایدهلنووچیلر سانی 30 فایزگه آشیب، 718 مینگ کیشیگه یېتگن. سۉنگگی بېش ییلده اېسه 4 میلیوندن آرتیق آنلاین اۉقووچی قید اېتیلگن.
اۉقیشگه قیزیقش آرتیب بارماقده. اینیقسه، بالهلر ادبیاتیگه طلب 75 فایزگه، قزاق و ترجمه کلاسیک اثرلرگه اېسه 50 فایزگه آشگن. “کتابخوان ملت” دستوری دایرهسیده استانه، آلماتی و قیزیل اۉردهده ینگی کتابخانهلر قوریلماقده.
شونینگدېک، آستانه شهریده ایروآسیا کتاب کۉرگزمهسی باشلنیب، “تورکی دنیا ادبیاتی” لایحهسی یۉلگه قۉییلماقده. متصدیلر کتاب اۉقیشنی قۉللب-قوتلش جمیعت کېلهجگیگه مهم سرمایه اېکنینی تاکیدلهدی.
23- اپریل خلقارا کتاب کونی دنیا بۉیلب نشانلهنهیاتگن بۉلسهده، افغانستاندېک بیر مملکت حلی هم سۉنگگی ییللردهگی معارف تیزیمی اۉزگریشلری بیلن دوچ کېلگن. “جهان اهالیسی تېکشیریش” ویبسایت بیلگیلریگه کۉره، افغانستان کتاب اۉقیش درجهسی بۉییچه اېنگ آخرگی اۉرینده تورهدی. افغانستانلیکلر ییلیگه اۉرتهچه 2،56ته کتاب اۉقیدی و 58 ساعت مطالعه قیلهدی. اوشبو رویخطده امریکا ییلیگه اۉرتهچه 17ته کتاب بیلن بیرینچی اۉریننی توتهدی. اوندن کیېن هندوستان(16ته کتاب)، بریتانیا(15ته کتاب)، فرانسه(14ته کتاب) و ایتالیا(13ته کتاب) کېینگی اۉرینلرنی اېگهلهگن.
افغانستانده کتاب اۉقیش فایزی کمهیشیگه؛ اقتصادی معمالر، کتاب و کتابخانهلر چېکلنیشی، دولت و تعلیم تیزیمدهگی معمالر، خوفسیزلیک و تینچسیزلیک، زمانهوی تکنالوژی تاثیری، عایلهوی محیطده کتاب اۉقیش کملیگی و باشقه معمالر سلبی تاثیر کۉرستگن. اینیقسه، تۉپلمدن خاتین-قیزلر اۉقیشی یاسیقلنگی سبب افسوسکه جمعیتنینگ کتاب اۉقیش فرهنگیگه و یوکسلیشیگه اېنگ کتته ضررنی بېرهدی.
