ایران تشقی ایشلر وزیرلیگی سۉزلاوچیسی اسماعیل بقایینینگ معلوم قیلیشیچه، عباس عراقچینینگ پاکستانگه تشریفی دوامیده ایران و امریکا اۉرتهسیده هېچ قندهی اوچرهشوو رېجهلشتیریلمهگن.
ایران تشقی ایشلر وزیری تیناوون جمعه اسلامآبادگه یېتیب بارگن و او یېرده پاکستان اوردوسی قوماندانی عاصم منیر، تشقی ایشلر وزیری اسحاقدار همده ایچکی ایشلر وزیری محسن نقوی تامانیدن کوتیب آلینگن.
بقاییگه کۉره، اوشبو تشریف دوامیده ایراننینگ موضع و ملاحظهلری پاکستان تامانیگه یېتکزیلهدی. شونینگدېک، عراقچی پاکستان رسميلری بیلن امریکا و اسرایلگه قرشی اوروشنی تۉختهتیش همده منطقهده تینچلیک اۉرنهتیش بۉییچه واسطهچیلیک سعی-حرکتلری یوزهسیدن مذاکرهلر اۉتکزهدی.
شو آرهده آق اوی امریکانینگ مخصوص وکیلی استیو ویتکاف و جرد کوشنر ایران بیلن مذاکرهلر اوچون پاکستانگه یۉل آلگنینی معلوم قیلدی.
بعضی منبعلرگه کۉره، ایران و امریکا هیئتلری پاکستان رسميلری بیلن علیحده اوچرهشوولر اۉتکزهدی و اگر مذاکرهلرده سیلجیش بۉلسه، یکشنبه کونی تۉغریدن-تۉغری ملاقات احتمالی هم بار. پاکستان اېسه تامانلرنی اسلام آبادده بېواسطه مذاکرهگه قَیته جلب قیلیشگه اورینماقده. بیراق ایران حاضرچه امریکانینگ دوام اېتهیاتگن دېنگیز قملی سببلی بو جریانگه راضی بۉلمهگن.
