بیرلشگن ملتلر تشکیلاتینینگ باش کاتبی آنتونیو گوترش خلق ارا مطبوعات اېرکینلیگی کونی مناسبتی بیلن برچه اېرکینلیکلر مطبوعات اېرکینلیگیگه باغلیق اېکنینی تأکیدلهدی.
بیرلشگن ملتلر تشکیلاتی باش کاتبی بوگون (یکشنبه، ۱۳-ثور) نشر قیلگن پیامیده یازیشیچه، «خبرچیلیک ضعیفلشگنیده، بحرانلرنینگ آلدینی آلیش و اولرنی حل اېتیش انچه قیینلشهدی. برچه اېرکینلیکلر مطبوعات اېرکینلیگیگه باغلیق. او حالده هېچ قندهی انسان حقوقلری، هېچ قندهی برقرار رواجلنیش و هېچ قندهی تینچلیک موجود بۉله آلمهیدی.»
آنتونیو گوترشنینگ قۉشیمچه قیلیشیچه، «اوشبو جهان مطبوعات اېرکینلیگی کونیده کېلینگ، ژورنالیستلر حقوقلرینی حمایه قیلهیلیک و حقیقت همده حقیقتنی ایتووچیلر خوفسیز بۉلگن دنیانی برپا اېتهیلیک.»
بیرلشگن ملتلر تشکیلاتی باش کاتبی اۉز مراجعتیده ژورنالیستلر ایش جریانیده دوچ کېلهدیگن خوف-خطرلرنی هم اېسلهتیب اۉتدی.
او شوندهی دېدی: «آدملر کۉپینچه اوروشده بیرینچی قربان حقیقت بۉلهدی، دېیدی. اما کۉپینچه بیرینچی قربانلر بو حقیقتنی یېتکزیش اوچون همه نرسهنی خوف آستیگه قۉیهدیگن ژورنالیستلردیر، نهفقط اوروشده، بلکه حاکمیت اېگهلری تېکشیروودن قۉرقهدیگن هر قندهی جایده.»
آنتونیو گوترشنینگ تأکیدلشیچه، دنیا بۉیلب یېتکرمهلر خادملری سانسور، کوزهتوو، حقوقي تعقیب و حتا اۉلیم خوفیگه دوچ کېلماقده.
اونینگ ینه قۉشیمچه قیلیشیچه «سۉنگگی ییللرده اوروش حدودلریده اۉلدیریلگن ژورنالیستلر سانینینگ کېسکین آشگنیگه گواه بۉلدیک، اولر کۉپینچه اتهیلب نشانگه آلینهدی. ژورنالیستلرگه قرشی صادر اېتیلگن جنایتلر نینگ 85 فایزی تېرگاو قیلینمهیدی و جزالنمهیدی، بو اېسه جزاسیزلیک نینگ مطلقا قبول قیلیب بۉلمهیدیگن درجهسی دیر.»
بیرلشگن ملتلر تشکلاتی باش کاتبیگه کۉره، «اقتصادي باسیملر، ینگی تکنالوژيلر و فعال مطبوعات اېرکینلیگینی مثلی کۉریلمهگن درجهده باسیم آستیگه قۉیماقده.»
او شونینگدېک: «ایشانچلی اخباراتگه اېریشیش یۉقالگنده، ایشانچسیزلیک ایلدیز آتهدی. جماعت محاکمهسی بوزیلگنده اېسه اجتماعي بیردملیک ضعیفلشهدی.»
سۉنگگی ییللرده اوکرایندهگی اوروش، غزه ماجرالری و لبنانندهگی اوروشلر سبب کۉپلب ژورنالیستلر رایورتاژلر وقتیده هلاک بۉلگن یاکه یرهلنگن، تورلی مملکتلرده ژورنالیستلرگه نسبتاً زۉراورلیک درجهسی آشگن.
افغانستانده هم طالبان قَیته حاکمیتنی اېگهلهگنیدن سۉنگ ژورنالیستلر و عاموی اخبارات واسطهلری فعالیتیگه کېنگ قمراولی چېکلاولر جاري اېتیلگن. بو گروه بیر نېچه بار یېتکرمه ادارهلریگه باستیریب کیریب، ژورنالیستلر و میدیا خادملرینی حبسگه آلگن همده یېتکرمه فعالیتینی تۉختهتگن.
