طالبان اۉزبېکلر و تورکمنلرگه قرشی سیاستلرینی دوام اېترر اېکن یقینده بو گروه اندخوینینگ توپراقلریگه کۉز تېکیب، قرمقُلده بیگانهلرگه ناقانونی تذکره ترقهتیشگه باشلهگن و بو اېسه کېنگ ناراضیلیکلرنی اۉرتهگه آلیب کېلگن.
اوشبو ناراضیلیکلر دوامیده، فاریاب سابق والیسی نقیبالله فایق طالباننینگ فاریاب ولایتی خوفسیزلیک قومندانلیگیگه تېگیشلی بیر مکتوبنی ترقهتیب، بو گروهنینگ رهبری هبتالله آخوندزاده هم بو خصوصده جدّی حرکتگه باشلهگنینی بیلدیرگن.
جناب فایق شونینگدېک، طالبان باش وزیری اقتصادی اۉرین باسری عبدالغنی برادرنینگ یقینده افغانستان شمالی ولایتلریگه قیلگن سفری و فاریاب سابق والیسی طالبان تامانیدن مخابرات و تکنالوژی اخبارات وزیری اېتیب تعیینلنگنی هم اۉزبېکلر و تورکمنلر یېرلرینی باسیب آلیش سیاستیگه باغلیق اېکنینی تاکیدلهگن.
فاریاب سابق والیسینینگ تاکیدلهشیچه، عبدالغنی برادر قرمقُلده تذکره ترقهتیش و یېرلرنی تقسیم اېتیش خصوصیده بۉلگن طالبان رهبرینینگ بویروغینی عملگه آشیریشگه بارگنی و بو سیاستگه قرضی اهالی غضبنی باستیریش اوچون نمایشی پروژهلرنی آچگنینی اورغولهیدی.
شو بیلن بیرگه، جناب فایق فاریاب سابق والیسی عبدالاحد فضلی طالباننینگ بو سیاستنی یخشیلب عملگه آشیرگنی اوچون وزیرلیک مکافاتی بیلن تقدیرلنگن دېب هم معلوم قیلدی.
ایتیش کېرهک که جناب فایق تامانیدن ترقهتیلگن مکتوبده، فاریاب خوفسیزلیک قومندانلیگی، طالبان گروهی رهبری بویروغی اساسیده، تذکره ترقهتیش جریانی اوچ کون ایچیده عملگه آشیریلیب و حساباتی شریک اېتیلیشی بیلدیریلگن.
