آلمان باش وزیری فریدریش مرتس ایراندن اۉزینینگ حربي هستوي دستورینی تۉلیق و بوتونلهی تۉختهتیشنی طلب قیلدی.
مرتس بو قبیل سۉزلرینی سهشنبه کونی (۱۵-ثور) برلینده پورتگال باش وزیری لوئیس مونتهنگرو بیلن اۉتکزیلگن قۉشمه مطبوعات انجمنیده بیلدیردی.
آلمان باش وزیری، «اېران اۉزینینگ حربي هستوي دستورینی تۉلیق و بوتونلهی تۉختهتیشی کېرهک دېب تاکدیلهدی.»
اونینگ ینه قۉشیمچه قیلیشیچه، تهران اسرایل و آلماننینگ منطقهدهگی شریکلریگه قرشی باشقه هجوملر عملگه آشیرمسلیگی لازم.
فریدریش مرتس فارس کۉرفزیده کېمهلر قتناوی اېرکینلیگینی تأکیدلب، ایران «وقتنی چۉزیش»دن واز کېچیب، منطقهنی گروگه آلیش اۉرنیگه مذاکرهلر چوکیسیگه قَیتیشی کېرهکلیگینی ایتدی.
آلمان باش وزیری حربي هستوي دستور تۉختهتیلیشینی تأکیدلهگن بۉلسه-ده، امریکا قۉشمه ایالتلری اوروشدن آلدین و اسلام آباد مذاکرهلری جریانیده دایم ایران تامانیدن یورانیومنی تۉلیق باییتیشنی تۉختهتیشنی طلب قیلیب کېلگن.
بونگه جوابن، ایران حکومتی باییتیشنی اۉزینینگ «اجرهلمس حقوقی» دېب بیلیشینی و انرژی همده علمي تدقیقاتلرگه اساسلنگن بو جریان مذاکره موضوعی اېمسلیگینی تأکیدلهیدی.
ایران رسميلری بیر نېچه بار اوشبو مملکت هستوي دستوریدن حربي مقصدلرده فایدهلنیش نیتی یۉقلیگینی بیلدیرگن. علی خامنهای هم هستوي قورال ایشلب چیقریشنی «حرام» دېب اعلان قیلگن اېدی.
