رواداری انسان حقوقلری تشکیلاتی هرات شهریده «نامناسب حجاب» بهانهسی بیلن عیاللرنی حبسگه آلیش حالتلریگه مناسبت بیلدیریب، طالباننی بو کبی اۉزباشیمچه حبسلرنی زودلیک بیلن تۉختهتیشگه چقیردی.
تشکیلات بیاناتیده ایتیلیشیچه، عیاللر نینگ کيینیش اسلوبی سببلی حبسگه آلینیشی کېسکین قارهلنگن.
اونده برچه حبسگه آلینگن عیاللرنی درحال و شرطسیز آزاد قیلیش همده عیاللرگه نسبتاً هر قندهی زۉروانلیک و اۉزباشیمچه حبسلرنی تۉختهتیش طلب قیلینگن.
رواداری انسان حقوقلری تشکیلاتی بوندهی عملیاتلر عیاللرنینگ اساسي حقوقلری، انسان قدر-قیمتی، شخصي اېرکینلیک و اېرکین حرکتلنیش حقوقلرینینگ آچیق-آیدین بوزیلیشی اېکنینی تأکیدلهگن.
معلوماتلرگه کۉره، هرات شهریده طالبان امر به معروف و نهی از منکر ادارهسی تامانیدن باشلنگن کمپاین دایرهسیده سۉنگگی ایکّی کون ایچیده اۉنلب عیاللر حبسگه آلینگن، اَیریم منبعلرده بو رقم۶۰ نفرگچه یېتگنی ایتیلماقده.
شونینگدېک، طالبان تامانیدن ترقهتیلگن آگاهلنتیریشده عیاللر کۉچهگه چیققنده برقع یاکه تۉلیق یاپووچی چادر کيیشی، عکس حالده اولر «تۉغریدن-تۉغری قماققه آلینیشی» ممکنلیگی بیلدیریلگن.
