طالبان حاکمیتیده اۉزبېک و تورکمنلرگه نسبتن کمسیتیشلر دوام اېتر اېکن، سۉنگّی کونلرده بو گروهنینگ پشتون عسکرلرینینگ بلخ ولایتی کلدار اولسواللیگیده و بدخشان ولایتینینگ ارگو اولسواللیگیده، اۉزبېکلر و تورکمنلرگه نسبتن ظالمانه یاندهشوولریدن شکایتلر بیلدیریلدی.
کلدار اولسواللیگی تورکمن اهالیسینینگ ایتیشیچه، طالباننینگ پشتون خلقیگه منسوب عسکرلری اهالیدن باجگیرلیک قیلیب، اولرنی آغیر شرایطگه قۉیگن.
کلدار اولسواللیگیدن منبعلر اۉزبېک تیوی گه ویدیو جونهتیب، بلخ اولسواللیگیدن کېلگن طالباننینگ پشتون اعضالری کلدار بازاریگه کېرهیاتگن موتر و ریکشالردن ۱۵۰ افغانی آلهیاتگنینی ایتهدیلر.
ویدیوده، کۉرینیشیچه طالبان عسکرلری هیچ نرسه یوکلنمهگن ریکشادن هم پول طلب قیلیشهدی. بو اېسه اهالینینگ شکایتیگه سبب بۉلهدی. شونینگدېک اهالی، طالباننینگ بو باسیملری سبب اولرنینگ اېکینچیلیک محصولاتلری جملهدن قاوونلر بازارگه کېرمهی توریب، چیریب کېتهیاتگنینی ایتهدی.
کلدار اولسواللیگی اهالیسینینگ بو خصوصده شکایتلری اجتماعی ترماقلرده کېنگ ترقهلیب، اهالی طالباننینگ پشتون اعضالرینی باسیملری و ظلملری آشهیاتگنیدن خواطر بیلدیرگن.
بدخشان ولایتی ارگو اولسواللیگیدن منبعلرنینگ اۉزبېک تیویگه تصدیقلهشیچه، بو اولسواللیکنینگ برچه قیشلاقلریده طالباننینگ پشتون جنگچیلری جایلهشیب، اهالینی آزار-اذیت قیلماقده.
منبعلر معلوماتیگه کۉره، بو جنگچیلر کوکنارنی یۉق اېتیش بهانهسی بیلن قیشلاقلر و یۉللرده چیکپاینتلر تشلب، اهالینی حددن تشقری اذیت قیلماقده دیر.
شونینگدېک، منبعلر طالبان شو بهانه بیلن ارگوده حربیلرینینگ کۉپهیتیرگنیدن هم خبر بېرهدی.
ارگو اهالیسینینگ ایتیشیچه، طالبان کوچلری یۉللرده چیکپاینت قۉییب، اۉتیب-قیتهیاتگن اهالینی کوکنار یۉق اېتیشگه مجبوری آلیب کېتماقده.
طالبان حاضرگچه، اۉزبېکلر و تورکمنلرنینگ بو شکایتلرینی اېشیتیش اوچون هیچ قندهی اعتبار قرهتگن اېمس.
