شنبه کونی (23 جوزا) آلماننینگ هامبورگ، دوسلدورف و نورنبرگ شهرلری همده اسپانیا پایتختی مادریدده مینگلب افغانستانلیک مهاجرلر طالبلر تامانیدن هراتده عیاللر و قیزلرنینگ حبسگه آلینیشی همده نمایشچیلرنینگ باستیریلیشیگه قرشی ناراضیلیک نمایشلری اۉتکزدیلر.
آلمان نینگ هامبورگ شهریده یشاوچی افغانستانلیکلر ناراضیلیک ییغینی تشکیل اېتیب، عیاللر و قیزلرنینگ اېرکین کيینیش حقوقی همده هرات اهالیسی نینگ تینچ نمایش اۉتکزیش حقوقینی قۉللب-قوّتلشلرینی بیلدیردی.
نمایشچیلر طالبلر تامانیدن عیاللر و قیزلرنینگ حبسگه آلینیشی همده هرات اهالیسی نینگ فقراوي ناراضیلیک نمایشلرینی زۉروانلیک بیلن باستیریلیشینی قارهلهدی.
تنیقلی افغانستانلیک صنعتکار فرهاد دریا هم اوشبو ییغینده نطق سۉزلب، افغانستان عیاللری حرمت، اېرکینلیک و قۉرقووسیز حیات کېچیریشگه لایق اېکنینی تأکیدلهدی.
اونینگ ایتیشیچه، عیاللر و قیزلر نینگ کییم-کېچهگی سببلی حبسگه آلینیشی جمعیتگه قۉرقوو محیطینی سینگدیرماقده.
دریا حاضرگی کونده قیز فرزند اوییدن تشقریگه چیققنیده، آنهلر اونینگ ساغ-سلامت قَیتیشینی خواطر بیلن کوتهیاتگنینی ایتیب، افغانستان عیاللری بوندهی قۉرقوو آستیده یشهمسلیگی کېرهکلیگینی تأکیدلهدی.
او، شونینگدېک، هېچ قندهی کوچ جمعیت نینگ یرمینی تشکیل اېتووچی عیاللرنی چېتلشتیره آلمهسلیگینی، چونکه عیاللر چېتلهتیلسه، اۉشه جمعیت نینگ کېلهجگی هم یۉقالیشینی قید اېتدی.
دوسلدورف شهریده هم بیر گروه آدملر ناراضیلیک نمایشی اۉتکزدی.
افغانستان نینگ سابق عالي تحصیلات وزیری عباس بصیر اوشبو تدبیر عیاللرگه بیردملیک بیلدیریش و اولرنینگ آوازینی خلقارا همجميتگه یېتکزیش مقصدیده تشکیل اېتیلگنینی ایتدی.
اونینگ سۉزلریگه کۉره، بوگونگی کونده طالبان حکمرانلیگی آستیده یوز بېرهیاتگن واقعهلر خلق نینگ، اینیقسه عیاللرنینگ شأنی و قدر-قیمتیگه قرشی آچیق تجاوزدیر.
بصیر، اگر بو وضعیت دوام اېتسه، جمعیت اوچون چیدهب بۉلمس «اجتماعي پارتلش» یوز بېریشی ممکنلیگینی هم تأکیدلهدی.
آلمان نینگ نورنبرگ ایالت بایرن شهریده هم بیر گروه آدملر ناراضیلیک نمایشی اۉتکزدی.
نمایشچیلر عیاللرنی قۉللب-قوّتلاوچی و طالبانگه قرشی شعارلر کۉتریب، «بیر کون عیناً شو عیاللر طالباننی مغلوب اېتهدی»، دېیه تأکیدلهدی.
اسپانیا پایتختی مادریدده هم افغانستان مهاجرلری عیاللرنی قۉللب-قوّتلش و طالبلرگه قرشی ناراضیلیک دستورینی تشکیل اېتدی.
تدبیر تشکیلاتچیلری خلقارا همجمعيتنی افغانستان عیاللرینی قۉللب-قوّتلشگه چقیردی.
اولر صحنه کۉرینیشی آرقهلی افغانستانده، اینیقسه هراتده عیاللر قندهی قیلیب اویده قالیشگه مجبور اېتیلهیاتگنی همده تشقریگه چیققن تقدیرده تحقیرلش، زۉرآورلیک و حبسگه آلیش خوفیگه دوچ کېلهیاتگنینی نمایش اېتدی.
نمایشده طالبلر خادیمی رۉلیدهگی اکتور حتا طالبان طلب قیلگن حجابنی کيگن عیاللرنی هم «محرم» یقین اېرکک قرینداشی یۉقلیگی سببلی قمچیلشی، تحقیرلشی و حبسگه آلیشی تصویرلندی.
جمعه کونی هم آلمان نینگ برلین شهری، کانادادهگی تورانتو و ابران پایتختی تهرانده هرات نمایشلری نینگ باستیریلیشیگه قرشی و عیاللرنی قۉللب-قوّتلش مقصدیده ناراضیلیک ییغیلیشلری بۉلیب اۉتگن اېدی.
طالبلرنینگ هراتده اۉزلری بېلگیلهگن کيینیش قاعدهلرینی جاري اېتیش بۉییچه یقینده باشلهگن کمپاینی مملکت بۉیلب کتّه قۉرقوو اویغاتگن.
معلوماتلرگه کۉره، هراتده اوچ کون ایچیده اۉنلب عیاللر حبسگه آلینگنیدن سۉنگ، شهر اهالیسی بیر هفته ایچیده ایکّی مراتهبه ناراضیلیک نمایشی اۉتکزگن، بیراق هر سفر طالبان اولرنی اۉقاتر قوراللر بیلن باستیرگن.
