بیرلشگن ملتلر تشکیلاتینینگ انسانپرورلیک یاردملرینی موافقلشتیریش ادارهسی (اوچا) خادیمی اولگا چرفکو یقینده بامیان ولایتیگه سفری چاغیده ایتیشیچه، بیر عیال داکتر اۉز لوازمینی ترک اېتسه، اونینگ اۉرنینی باسیش دېیرلی امکانسیز بۉلیب قالماقده.
اونینگ سۉزلریگه کۉره، بو حالت عیاللر و قیزلرنینگ حیاتینی سقلب قالووچی طبي خدمتلرگه جملهدن آنهلر و چقهلاقلر پرورشی، شونینگدېک، تۉییب طعاملنمسلیک (سویوق طعاملنیش یېتیشماوچیلیگی) بیلن باغلیق خدمتلر و تعلیمگه کیریشینی کېسکین چېکلب قۉیماقده.
بیرلشگن ملتلر تشکیلاتی خادیمی طالبان تامانیدن جاري اېتیلگن قیزلر تعلیمیگه چېکلاولر اولرنی کېلهجکده ایش بیلن تأمینلنیش امکانیدن هم محروم قیلهیاتگنینی قۉشیمچه قیلگن.
او شوندهی دېگن: «مېن صحبتلشگن برچه عیاللر اۉز قیزلرینینگ مکتبگه باره آلمهسلیگی و احتمال کېلهجکلری بۉلمسلیگیدن چوقور خواطرده.»
بیرلشگن ملتلر تشکیلاتی وېب-سایتی گزارشیده بامیان ولایتیده قیشلاق اهالیسی اۉرتهسیدهگی اساسي ماجرا سببی سوو یېتیشماوچیلیگی اېکنی ایتیلهدی.
اولگا چرفکو بامیاندهگی اوزاق قیشلاقلردهگی وضعیتنی «ارواح قیشلاقلر» دېب تعریفلب، امکان تاپگن آدملر الّهقچان او یېرلردن کۉچیب کېتگنینی بیلدیرگن.
اونینگ سۉزلریگه کۉره: «مېن بارگن بیر قیشلاقده مېنگه اهالی نینگ یرمی کېتیب قالگنی ایتیلدی، چونکه سوغاریش اوچون سوو یۉق اېدی و حاصللر قوریب قالگن اېدی. کۉچیشگه قُربی یېتگنلر کېتگن.»
اونینگ قۉشیمچه قیلیشیچه، قالگنلر اېسه باشقه چاره تاپه آلمهیدی، «اولر کېتیش خرجتینی هم کۉتره آلمهیدی.»
بیرلشگن ملتلر تشکلیاتی وکیلی ینه بیر واقعهنی کېلتیرگن: او اوچرهشگن بیر اېرکک نینگ تۉقّیز نفر عایله اعضاسی بار اېدی. او توشلیک اوچون نیمه یېیاتگنینی کۉرسهتگن؛ اصلیده چیریگن کچالو پۉستیگه اۉخشش نرسه بۉلیب، فقط تیریک قالیش اوچون شۉروا قیلیب پیشیریلگن اېدی.
اولگا چرفکو نینگ ایتیشیچه، بو حالت افغانستاندهگی اېنگ ضعیف عایلهلرنینگ اچّیق حقیقتی بۉلیب، ۲۰۲۱-ییلده کابل طالبان قۉلیگه اۉتگنیدن بېری اقلیم اۉزگریشی، قورغاقچیلیک، کېنگ ترقهلگن تۉییب طعاملنمسلیک و عیاللرگه چېکلاولر طفیلی ینه-ده آغیرلشگن.
بیرلشگن ملتلر تشکیلاتی معلوماتیگه کۉره، جاري ییلده افغانستانده۲۲ میلیون کیشی اقلیم اۉزگریشی عاقبتلری، قشّاقلیک، ایشسیزلیک، مهاجرت و ایچکی کۉچیشلر سببلی بشری یاردمگه محتاج.
بیراق ضرور۱.۷میلیارد دالر یاردم بودجه نینگ اتیگی۱۴ فایزی مالیهلشتیریلگن.
شونینگدېک، آزیق-طعام خوفسیزلیگی و قشّاقلیک سبب بو ییل۳.۷میلیون باله افغانستانده «اۉتکیر تۉییب طعاملنمسلیک» معماسیگه دوچ کېلماقده.
