افغانستانده بیرلشگن ملتلر تشکیلاتینینگ یاردم ادارهسی (یوناما) خلقارا «دیپلوماتيهدهگی عیاللر کونی» مناسبتی بیلن عیاللرنینگ مضمونلی و ثمرهلی اشتراکینی تأمینلش ضرورلیگینی ینه بیر بار تأکیدلهدی.
یوناما بوگون (چهارشنبه، ۳-سرطان) فیس بوک صحیفهسیده نشر قیلگن بیاناتیده افغانستانده تینچلیک و ترقیات اوچون عیاللرنینگ اشتراکی همده آوازی مهم اهمیتگه اېگه اېکنینی بیلدیردی.
بیاناتده ایتیلیشیچه، عیاللر خلقارا همکارلیکنی مستحکملش، تینچلیک جریانلرینی ایلگری سوریش و اینکلیوزیو قرارلر قبول قیلیشده قیمتلی همده تأثیرچن رۉل اۉینهیدی.
یونامانینگ تأکیدلشیچه، عیال دیپلوماتلر خلقارا مناسبتلر ساحهسیدهگی عادي اشتراکچیلر اېمس، بلکه یېتکچیلر، تینچلیک واسطهچیلری و تېنگلیک حمایهچیلریدیر.
بیرلشگن ملتلر تشکیلاتینینگ افغانستاندهگی نمایندهلیگی عیاللرنینگ جماعت حیاتی و قرار قبول قیلیش جریانلریدهگی مضمونلی اشتراکینی تأمینلش هنوز اساسي اهمیتگه اېگه اېکنینی قید اېتدی.
یوناما افغانستان عیاللری و قیزلری اوچون تېنگ امکانیتلر یرهتیلیشی لازملیگینی اورغولب، اولر تعلیم آلیشی، رهبرلیک قیلیشی همده جمعیت نینگ برچه ساحهلریده، جملهدن دیپلوماتيه و دولت خدمتلریده فعال رۉل اۉینشی کېرهکلیگینی بیلدیردی.
تشکیلاتنینگ بیاناتیگه کۉره، عیاللرنینگ تۉلیق و مضمونلی اشتراکی کوچلیراق، برقرارراق و تینچراق جمعیتلرنی برپا اېتیش نینگ اساسي شرطلریدن بیریدیر.
شونینگدېک، یوناما مملکتده برقرار تینچلیک، اینکلیوزیو رواجلنیش و یارقین کېلهجکنی تأمینلش اوچون عیاللرنینگ اشتراکی و آوازی ضرورلیگینی تأکیدلهدی.
بو بیانات طالبان نینگ افغانستانده حاکمیتنی قَیته اېگهلهگنیدن کېین عیاللرنی کۉپلب جماعت و اجتماعي ساحهلردهگی فعالیتدن چېتلشتیرگنی یانیده ینگرهماقده.
حاضرگی وقتده افغانستانده عیاللر دولت ادارهلرینینگ یوقاری سیاسي، حقوقي و باشقروو لوازملریده همده خصوصي سکتورنینگ رهبرلیک درجهلریده دېیرلی فعالیت یوریتمهیپتی.
«دیپلوماتيهدهگی عیاللر کونی» 1994-ییلدن بویان نشانلنیب کېلینهدی. بیراق بیرلشگن ملتلر تشکیلاتی نینگ عمومی مجمعهسی2022-ییلده 24-جون سنهسینی رسماً اوشبو کون صفتیده بېلگیلهگن.
طالبلر افغانستان عیاللرینی دیپلوماتيه و رهبرلیک ساحهلریدن چېتلشتیرگن بۉلسه-ده، سۉنگگی بېش ییل دوامیده کابلدهگی بیرلشگن ملتلر تشکیلاتی و اروپا بیرلشمهسیده عیال رهبرلر باشچیلیک قیلیب کېلماقده.
