افغانستاننینگ بیرلشگن ملتلر تشکیلاتیدهگی نمایندهلیگی سرپرستی نصیراحمد فایق، مملکتده جزادن خالی قالیش مدنیتینینگ کېنگهییشی سِرلی قاتللیکلر، زۉرلش، آدم اۉغیرلش و باشقه زۉروانلیک حالتلرینینگ کۉپهییشیگه سبب بۉلهیاتگنینی ایتدی.
فایق بوگون (دوشنبه، 22-سرطان) ایکس اجتماعي ترماغیده سِرلی قاتللیکلر و عیاللرگه نسبتاً جنسي تجاوزلر حقیدهگی خبرلر سرلوحهلری عکس اېتگن صورتلرنی اولشیب، اۉز مناسبتینی بیلدیردی.
او شوندهی یازدی: «افغانستان بۉیلب سِرلی قاتللیکلر، زۉرلش، آدم اۉغیرلش، اۉزباشیمچهلیک بیلن قتل اېتیش، مجبوري نکاحلر و باشقه جنایتلرنینگ خواطرلی درجهده کۉپهییشی طالبان حکمرانلیگی آستیده قانون اوستوارلیگی نینگ یۉقلیگی، عدلیه تیزیمی نینگ ضعیفلشووی و جزادن خالی قالیش مدنیتینینگ کېنگهییشینینگ بېواسطه نتیجهسیدیر.»
اونینگ تأکیدلشیچه، بو حالت مملکتده حقیقي خوفسیزلیک یۉقلیگینی کۉرسهتهدی.
فایق شوندهی دېدی: «حقیقي خوفسیزلیک فقط اوروش و قوراللی تۉقنهشوولرنینگ یۉقلیگی بیلن اۉلچنمهیدی. خوفسیزلیک اهالی قانون اوستوارلیگی، عدالت و جوابگرلیک حکم سورگن شرایطده قاتللیک، زۉرلش، آدم اۉغیرلش و زۉرآورلیکدن قۉرقمهی یشهی آلگنیدهگینه مضمون کسب اېتهدی.»
اونینگ سۉزلریگه کۉره، بوگونگی کونده افغانستان هر قچانگیدن هم انه شوندهی خوفسیزلیکدن محروم.
فایق بو وضعیتنینگ اېنگ آغیر عاقبتلرینی «عیاللر، بالهلر و باشقه حمایهسیز فقرالر» باشدن کېچیرهیاتگنینی تأکیدلهدی.
طالبلر حاکمیتنی اېگهلهگنیدن سۉنگ عیاللرنی حمایه قیلووچی قانونلر و نهادلرنی بېکار قیلدی همده ینگی چېکلاولر جاري اېتیب، عیاللرنینگ عدالتگه اېریشیش امکانیتینی کېسکین چېکلهدی. حمایه میکانیزملرینینگ یۉقلیگی سببلی زۉروانلیک، اینیقسه قاتللیک، زۉرلش، اۉز جانیگه قصد قیلیش و مجبوري نکاحلر بیلن باغلیق کۉپلب ایشلر تېرگاو قیلینمهیپتی. انسان حقوقلری تشکیلاتلری بو حالت جزادن خالی قالیش محیطینی کوچهیتیریب، عیاللرگه نسبتاً زۉروانلیکنینگ آرتیشیگه آلیب کېلهیاتگنینی تأکیدلهماقده.
