اېراننینگ کابلدهگی اېلچیخانهسی ایران خلقی تامانیدن نورستاندهگی سۉنگّی سوو تاشقینیدن جبرلنگنلر اوچون یوباریلگن انسانپرورلیک یاردمی ولایت مرکزی پارون شهریگه یېتیب کېلگنینی معلوم قیلدی.
اېلچیخانه یوک آرتیلگن بیر نېچه موتر عکس اېتگن ویدېونی نشر قیلیب، یاردم یوکلری اون و اۉسیملیک یاغیدن عبارت اېکنینی همده اولرنی سوو تاشقینیدن ضرر کۉرگن عایلهلرگه ترقهتیش رېجهلشتیریلگنینی بیلدیردی.
مذکور یاردم نینگ انیق حجمی حاضرچه معلوم قیلینمهگن.
جاري هفتهنینگ دوشنبه کونی نورستان، ننگرهار و لغمان ولایتلریده کوچلی یاغاینگرچیلیک همده ویرانکار سوو تاشقینلری کوزهتیلگن اېدی.
بیرلشگن ملتلر تشکیلاتینینگ انسانپرور مسألهلرنی موافقلشتیریش اداره (اوچا) نینگ تصدیقلشیچه، نورستان ولایتی مرکزی پارون شهریده کمیده 23 کیشی هلاک بۉلگن، 15 کیشی جراحت آلگن، ینه بیر نېچه کیشی بېدرَک یۉقالگن. شونینگدېک، ننگرهار ولایتیدهگی تورخم چېگره اۉتیش یۉلیده اوچ کیشی هلاک بۉلگن و ینه تۉقّیز کیشی یرهلنگن.
