طالبلرنینگ هرات ولایتی امنیه قوماندانلیگی مطبوعات سۉزلاوچیسی سید مسعود حسینینینگ ایتیشیچه، بیر یریم یاشلی بالهنی بنا نینگ بېشینچی قبتیدن تشلب یوباریب، اونینگ اۉلیمیگه سبب بۉلگنلیکده گمان قیلینگن بیر عیال قۉلگه آلینگن.
باختر اخبارات آژانسی هراتدن خبر بېریشیچه، مسعود حسینی گماندار دستلبکی تېرگاو جریانیده اوشبو قیلمیشنی تن آلگنینی بیلدیرگن.
حسینینینگ سۉزلریگه کۉره، اوشبو عیال حادثه یوز بېرگن اویده فرّاش بۉلیب ایشلهگن.
طالبلرنینگ هراتدهگی امنیه قوماندانلیگی مطبوعات سۉزلاوچیسی عیال نینگ بالهنی بنادن تشلشیگه گماندار بیلن اوشبو عایلهده ایشلاوچی ینه ایکّی فرّاش اۉرتهسیدهگی شخصي کېلیشماوچیلیک و عداوت سبب بۉلگنینی ایتدی.
تیناوون هرات شهریدهگی قۉل-اوردو عایلهوي تورر جایلری حدودیده۵۵ یاشلی عیال بیر بالهنی بنادن پستگه تشلهگنی حقیده خبرلر ترقهلگن اېدی.
محلي منبعلرگه کۉره، اوشبو واقعهده هلاک بۉلگن باله نینگ اسمی نوران بۉلیب، اونینگ عایلهسی یقینده آلماندن هراتگه قَیتیب کېلگن اېدی.
منبعلرنینگ ایتیشیچه، باله نینگ آنهسینینگ مبایل تیلفونی و معلوم مقداردهگی نقد پولی یۉقالگچ، عایلهده ایشلاوچی فرّاشلر اۉغریلیکده گمان قیلینگن. ماجرا کوچهیگچ، عایله تخمیناً۱۵ییلدن بېری او یېرده ایشلهگن فرّاش عیالنی ایشدن بۉشهتیشگه قرار قیلگن.
مذکور واقعهدن خبردار شخصلرنینگ بیلدیریشیچه، عیال اۉغریلیکده عیبلنیب، ایشدن بۉشهتیلیشینی بیلگچ، ۱۵-اسد، پنجشنبه کونی اېرتهلب، عایله یۉقالگن تیلفون مسألهسی بیلن بند بۉلگن پیتده بېشینچی قبتگه چیقیب، بالهنی دېرَزهدن پستگه اولاقتیرگن.
طالبلرنینگ هراتدهگی امنیه قوماندانی اوشبو حادثهنینگ برچه تفصیلاتلرینی انیقلش یوزهسیدن تېرگاو ایشلری دوام اېتهیاتگنینی معلوم قیلدی.
