«افغانستان بیرلشگن جبههسی» اۉز کوچلری سۉنگّی 48 ساعت ایچیده مملکتنینگ بېش ولایتیده طالبلرگه قرشی هجوملر اویوشتیرگنی و تۉقنهشوولر عاقبتیده 19 کیشی طالبان اعضاسی هلاک بۉلگنی یاکه یرهلنگنینی دعوا قیلدی.
جبهه 16-اسد، جمعه آقشامی اعلان قیلگن بیاناتیده هجوملر قندهار، هلمند، غور، بغلان و بدخشان ولایتلریده عملگه آشیریلگنینی معلوم قیلدی.
بیاناتده ایتیلیشیچه، اوشبو هجوملر دوامیده جبهه کوچلری طالبلرنینگ ایکّی قرارگاهینی اېگهلهگن همده کۉپلب قورال-یراغ و اۉق-داریلرنی قۉلگه کیریتگن.
جبههنینگ دعوا قیلیشیچه، اونینگ کوچلری قندهار ولایتی میوند اولسواللیگی «بند تېمور» منطقهسیده ایکّی علیحده عملیات اۉتکزگن. اولرنینگ بیریده طالبلرنینگ یوقاری لوازملی پولیسی هلاک بۉلگن.
شونینگدېک، جبهه قندهار شهرینینگ 15-خوفسیزلیک منطقهسیده اۉتکزیلگن ینه بیر عملیات دوامیده بیر طالب اعضاسی اۉلدیریلگنینی بیلدیرگن.
جبهه معلوماتیگه کۉره، سۉنگّی ایکّی کېچه و کوندوز ایچیده هلمند ولایتی نوزاد اولسواللیگی «بر نوزاد» منطقهسیده عملیات اۉتکزیلگن و نتیجهده بیر کیشی طالبل قوماندانی هلاک بۉلگن.
بیاناتده ینه ایتیلیشیچه، غور ولایتی الفاروق اولسواللیگی «گرداب» منطقهسیده طالبلرنینگ بیر قرارگاهی اېگهللنگن. نتیجهده ایکّی نفر طالبان اعضاسی هلاک بۉلگن، تۉرت نفری اېسه یرهلنگن.
شونینگدېک، بغلان ولایتی پول حصار اولسواللیگیده هم طالبلرنینگ بیر حربي قرارگاهی اېگهللنگنی، بو نینگ عاقبتیده ایکّی طالب اعضاسی هلاک بۉلگنی، ینه اوچ نفری یرهلنگنی بیلدیریلگن.
«افغانستان بیرلشگن جبههسی» بدخشاندهگی ایلک هجومی حقیده هم خبر بېریب، ارگو تومنیده بیر طالب اعضاسینی اۉلدیرگنی و ینه تۉرت نفرینی یرهلهگنینی دعوا قیلگن.
بیراق طالبان حاضرچه اوشبو دعوالرگه مناسبت بیلدیرمهگن.
