ایران یېتکرمهلرینینگ خبر بېریشیچه، ایران جَنوبیدهگی هرمزگان ولایتینینگ رودان اولسواللیگیده افغانستانلیک مهاجرلرنی آلیب کېتهیاتگن موتر اغدریلیب کېتیشی عاقبتیده بیر کیشی هلاک بۉلگن، ینه۱۷کیشی جراحتلنگن.
ایرنا اخبارات آژانسی محلي مسووللرگه تهیهنیب، اوشبو حادثه کېچه تونده (پنجشنبه،۲۲ اسد) صادر بۉلگنینی خبر قیلگن.
اوشبو نشر نینگ خبریگه کۉره، هرمزگان شاشیلینچ طبي یاردم مرکزی باشلیغی یاسر خوانچهمهر نینگ ایتیشیچه، حادثه رودان و میناب یۉللری کېسیشمسیده صادر بۉلگن. «وانت نیسان» روسوملی موتر اغدریلیب کېتیشی عاقبتیده بیر کیشی هلاک بۉلگن، ینه۱۷ کیشی جراحتلنگن.
اونینگ سۉزلریگه کۉره، جراحتلنگنلر یېتّیته تېز یاردم موترسیده رودان شهریدهگی امام علی شفاخانهسی و میناب شهریدهگی ابولفضل شفاخانهسیگه آلیب باریلگن.
حادثه نینگ سببی حاضرچه معلوم اېمس.
افغانستانده طالبلر حاکمیتگه کېلگنیدن سۉنگ قشّاقلیک و ایشسیزلیکنینگ کوچهییشی سببلی هر کونی مینگلب یاشلر ایش تاپیش امیدیده ایران تامان خوفلی ناقانوني یۉللر آرقهلی یۉل آلیشماقده.
ترافیک حادثهلری، ایران چېگرهچیلری نینگ اۉق اوزیشی، پاکستان حدودیده نادولت قوراللی گروهلر تامانیدن گروگه آلینیشی همده چۉللرده هلاک بۉلیش حالتلری ایش ایزلهیاتگن اوشبو مهاجرلر آرهسیده دایمي روشده قربانلر کېلتیریب چیقرماقده.
سۉنگی هفتهلرده کمیده۱۹ نفر یاش ایران حدودیگه یېتیب بارمسدن، نیمروز ولایتینینگ قوروق و جزیرهمه چۉللریده بېدرَک یۉقالگن و تشنهلیک همده آچلیک عاقبتیده هلاک بۉلگن.
