افغانستاننینگ اساسا اۉزبېکلر یشاوچی ولایتلریده اۉتگن آقشم قریب ساعت ۵:۰۰ دن بیری برق تامیناتی اۉزیلگن و طالبان نظارتیدهگی برشنا شرکتی اۉتگن کېچه بیانات ترقهتیب، تورکمنستاندهگی تخنیکی معما سبب، افغانستانگه یوباریلگن برق کېسیلیب قۉییلگنینی اعلام قیلدی.
طالبان بیاناتیده، اوشبو معما سبب بلخ، جوزجان، سرپل، فاریاب، بادغیس، هرات و سمنگان ولایتلریده برق تامیناتی معماگه دوچ کېلگنی و بو معما حل اېتیلیشی اوچون اینتیلیشلر دوام اېتهیاتگنی بیلدیریلگن.
اۉزبېک تیوی بو معما انیق سببنی سوریشتیریش مقصدیده، طالبان نظارتیدهگی برق تامیناتی محلی خادملریدن بیریدن، معلومات سۉرهگن.
اوشبو منبعنینگ ایتیشیچه اۉتگن آقشم ساعت بېشدن بیری برق اوزیلگن و یالغیز ولایتلر مرکزلریده گی ایریم ساحهلرده باشقه منبعلردن بیرآزگینه برق یېتکزیلگن باشقه عموما برق تامیناتی یۉق دیر.
شونینگدېک، منبع اۉزبېک تیوی گه ایتیشیچه، برق تامیناتی طالبان و تورکمنستان اۉرتهسیدهگی قراردادگه کېلیب چیققن معما سبب اوزیلگنی حقیده هم گپلر موجود دیر. بیراق بو معما انیق نیمهلیگی بیللی اېمس.
طالبان نظارتیدهگی برشنا شرکتی هم بیاناتیده، اۉزبېکستان رسیملری بیلن هم مقابل یۉلدن برقنی تامینلشگه حرکت قیلهیاتگنی بیلدیریلگن بیراق حاضرگچه طالباننینگ بو حرکتی هم نتیجه بېرمهگن و یوقاریده اېسلب اوتیلگن ولایتلر همان قرانغولیکده قالماقده دیر.
