اېران تشقی ایشلر وزیرلیگی امریکانینگ لارک آرالیگه اویوشتیرگن هجومینی ایران ملي حاکمیتی نینگ بوزیلیشی، ایران کوچلرینینگ قرشی هجوملرینی اېسه قانوني مدافعه دېب اتهدی.
ایران تشقی ایشلر وزیرلیگی بیاناتیده امریکا «ایران اسلام جمهوریتی نینگ ملي حاکمیتی و حدودي یخلیتلیگینی بوزگن حالده» لارک آرالی نینگ اَیریم قِسملریگه هجوم قیلگنی ایتیلگن.
وزیرلیک نینگ معلوم قیلیشیچه، اوشبو هجومده «بیر نېچه نفر» حربي خدمتچی و بیر قطار تینچ اهالی وکیللری هلاک بۉلگن یاکه یرهلنگن، شونینگدېک، دولت و خصوصي ملککه ضرر یېتگن.
وزیرلیکنینگ قۉشیمچه قیلیشیچه، ایران قوراللی کوچلری «اۉزی نینگ اجرهلمس قانوني مدافعه حقوقیگه موافق» اوردندهگی امریکا حربي پایگاهلرینی نشانگه آلگن.
ایران تشقی ایشلر وزیرلیگی مملکت «هر قندهی حربي تجاوزگه قطعي جواب بېریشینی» تأکیدلهگن.
بیراق امریکا مرکزي قوماندانلیگی سنتکام یقینلشیب کېلهیاتگن تهدید نینگ آلدینی آلیش مقصدیده هرمز بۉغازینی خوفلی حالگه کېلتیرهیاتگن ایران نینگ ماین قۉیووچی قَییقلرینی نشانگه آلگنینی بیلدیرگن. شونینگدېک، امریکا رسميلری یېتکرمهلر بیلن صحبتلرده اېران جَنوبیدهگی لارک آرالیده ایکّیته راکت قوریلمسی نشانگه آلینگنینی تصدیقلهگن.
