قزاقستانلیک دیزاینر راوشن انوربېکووا نینگ مجموعهسی نیویورک نینگ منهتن حدودیدهگی 1010 پارک اونیو بناسیده نمایش اېتیلدی. “دنیانی حیرتگه سالگن قزاق بوویلری”(Älemdi tañğaldyrğan qazaq äjeleri ) رېجهسی مده نمایشی نینگ اساسی اعتبار مرکزلریدن بیریگه ایلندی.
یاشی کتته مدللر “اَلَشه” (Alasha) مجموعهسیدهگی کییملرده خلقارا مده صحنهسیگه چیقیشیدی. اوشبو مجموعه عنعنهوی قزاق کییملرینی زمانهوی دیزاین بیلن اویغونلشتیرهدی. رېجه دانشمنلیک و قدر-قیمت رمزی بۉلگن “اژه”( äje)، یعنی بووی تمثالی آرقهلی قزاقستان ملی کییملرینی ترغیب قیلیش و خلقارا کۉروچیلرنی قزاق مدنیتی بیلن تانیشتیریشنی مقصد قیلگن.
نمایشدن ایلگری مدللر ملی کییملرده نیویورک کۉچهلرده هم یوریب، قزاق عنعنهلری زمانهوی کتته شهر اسلوبی بیلن قندهی طبیعی اویغونلشیشی ممکنلیگینی نمایش اېتدیلر.
انوربېکووا نینگ مجموعهسی فرانسهلیک تانیقلی مده دیزاینرلری کریستین دیور نینگ الهام قیناغی بۉلگن قزاق مدلی اله الچونگه بغشلنگن. بو ییل اونینگ توغیلگن کونیگه 100 ییل تۉلدی.
انوربېکووا نینگ سۉزلریگه کۉره، مجموعهده دیور تیکوچیلیک اسلوبی نینگ ایریم ایلیمنتلریدن آسیغلنگن یا فایدهلنگن، بیراق اونه دیور ایجادینی تکرارلهیدی، نه ایلچون نینگ شخصی اسلوبیگه تقلید قیلهدی.
انوربېکووا شوندهی دېدی: «بیز اوشبو مجموعهنی بو ایکّی بویوک سیماگه حرمت صفتیده یرهتدیک. اله ایلچون قزاق اېدی و بو بیز نینگ تاریخیمیز همده مدنیتی میز نینگ بیر قسمی دیر. اونینگ جهان مده صناعتیگه قۉشگن اولوشی بیز فخرلنیشیمیز ممکن بۉلگن میراث دیر.»
دیزاینر “دنیانی حیرتگه سالگن قزاق بوویلری” رېجهسی ملی کییملرینی نمایش اېتیشدن انچه کېنگراق معناگه اېگه اېکنینی تاکیدلهدی. هر بیر قتنشووچی نینگ اۉز حیاتی حکایهسیی بار-اولر فرزندلرینی وایهگه یېتکزگن، محنت قیلگن اینیقسه عایلهسی و اولکهسیگه اۉز اولوشینی قۉشگن خاتینلر دیر.
دیزاینر شوندهی دېدی: «بیز نینگ رېجهمیز فقط گۉزهللیک و مده حقیده اېمس. او جمعیت، یاش و کتته اولادلر اۉرتهسیده باغلیلیک یرهتیش حقیده. بو یېرده بیر حکایه باشقه بیر حکایه بیلن چمبرچس باغلنگن.»
رېجه وکیللری نینگ ایتیشیچه، قزاق ملی کییملریگه خلقارا قیزیقیش آرتیب بارهیاتگنی اونینگ قزاقستاندن تشقریده هم تاباره عامهلشتیرهیاتگنینی کۉرستهدی. انوربېکووا مجموعهسی عنعنهوی دیزاین بیلن اویغونلشتیریب، خلقارا مدهدهگی ینگی یۉنهلیشلریدن آرته قالمهگن حالده جهان تماشابینلرینی قزاق مدنیتی بیلن تانیشتیریشگه قرهتیلگن.
رېجه قتنشووچیسی تیلکیشی امانگیلدیووا قزاق دیزاینلرینی خارجده ترغیب قیلیش غایهسی سۉنگّی نمایشدن اول تاپیلگنینی ایتدی. او نیویورکده اول نیویورک مده هفتهلیگی تدبیرلریده قتنشگن آتیرائولیک مده ساحهسی وکیلی بیلن اوچرشگن.
اوشبو لایحه ایلگری هم قزاق ملی کییملرینی ییریک خلقارا مده تدبیرلریده نمایش اېتگن. 2025-ییلده لایحه قتنشووچیلری پاریس مده هفتهلیگی و میلان مده هفتهلیگیده قتنشیب، ملی اسلوبدهگی «آق مرجان» مجموعهسینی تقدیم اېتیشگن.
بوندن ایلگری قزاقستان نینگ عنعنهوی هنرمندچیلیگی 2026-ییلده نیو دهلیده اۉتکزیلگن ( BRICS BAZAAR) تدبیریده هم نمایش اېتلگن.
قیناق: قازین فورم
