امریکا قوشمه ایالتلری‌ده دونالد ترامپ حکومت‌نی قۉلگه آلگندن بیری، روسیه بیلن مناسبت‌لرنی یخشی‌لنتیریش همده بو بیلن اوکراین‌ده دوام اېتیب تورگن اوروش یکونلنیشی مقصدیده، جدی اینتیلیش‌لر باشلنگن.
اوشبو سعی‌وحرکتلر دوامی‌ده، روسیه و امریکا وکیللری اوچ مراتبه یوز مه یوز اۉلتیریب، تورلی مساله‌لر جمله‌دن اوکراین اوروشی حقیده فکر المشتیردی‌لر.
بوگون دوشنبه، ۴ – حمل دنیا نینگ بو ایکی ییریک کوچی وکیللری، ینه بیربار ریاض شهریده اوچره‌شیب، ایریم مساله‌لر اوستیده فکر المشتیرماقده دیر.
ییغین‌ده ایکی تاماندن کیم‌لر اشتراک قیلگن؟
روسیه‌لیک یېتکیرمه‌لر تامانیدن نشر اېتیلگن معلومات‌لرگه کۉره، امریکا بیلن روسیه سۉزلشوولری نینگ بو دوری‌ده، روسیه تامانیدن ایکی کیشی اشتراک قیلگن.
روسیه یېتکیرمه‌لری بو کیشی‌لردن روسیه نینگ خلق‌ارا ایشلر بۉییچه کمیته‌سی نینگ باشلیغی گریگوری کاراسین و روسیه فدرال خوفسیزلیک اداره‌سی باشلیغی نینگ مصلحتچیسی سرگی بیسدا دېب آت توتگن.
شونینگدېک یېتکیرمه‌لر امریکا وکیللری نینگ کیم‌لیگی حقیده هم معلومات بېریشیچه، بو ییغین‌ده امریکا تامانیدن بو مملکت تشقی ایشلر وزیرلیگیدن مایکل آنتون، اوکراین مساله‌سی بۉییچه امریکا نینگ مخصوص وکیلی کیت کلوگ و امریکا ملی خوفسیزلیک کېنگشی تامانیدن هم بیر وکیل اشتراک قیلگن.
امریکا و روسیه وکیللری نیمه‌لرنی محاکمه قیله‌دی؟
ریاض شهریده امریکا و روسیه وکیللری نینگ ییغینی‌ده، اوکراین اوروشی یکونلنیشی خصوصیده بۉلگن ییچیم-یۉللرگه قوشیمچه، ایریم باشقه بیر قنچه مساله‌لر هم بحث اېتیلیشی معلوم قیلینگن.
بوغدای صادراتی: اوکراین‌ده بو مملکت و روسیه آره‌سیده اوروش باشلنگندن کیین روسیه نینگ باسیمی عاقبتیده، اوکراین بوغدای صادراتی برابریده چیکلاو یره‌تیلیب، قاره دینگیز آرقه‌لی اوکراین بوغدایی صادر اېتیلیشی تۉخته‌تیلگن اېدی.
حاضر نشر اېتیلگن معلومات‌لر اساسیده، روسیه و امریکا وکیللری بو صادرات قیته باشلنیشی اوچون خوف‌سیز بیر کریدور ایجاد اېتیلیشی مساله‌سینی هم محاکمه قیله‌دی.
روسیه‌لیک اسپوتنیک یېتکیرمه‌سی، امریکا و روسیه وکیللری بوغدای صادراتی برابریده قوله‌یلیک یره‌تیلیشی مقصدیده، قاره دینگیزده آتیش-کېسین برقرارلنیشی تۉغریسیده هم بحث قیلماقده‌لیگیدن خبر بېردی.
روسیه و امریکا مناسبت‌لری: ییللردن بویان خلق‌ارا دیپلوماسیده بیر بیراوی نینگ جدی رقیب‌لری بۉلگن روسیه و امریکا قوشمه ایالتلری آره‌سیده‌گی مناسبت‌لر اوکراین اوروشی باشلنیشی‌دن کیین یامان‌لشگن اېدی.
امریکا سابق جمهور باشلیغی جوبایدن دوری‌ده بو قرمه-قرشی‌لیکلر جدی دوام اېتدی. حاضر اېسه دونالد ترامپ قدرتگه کېلگنیدن بیری مناسبت‌لر یخشی‌لنیشی اوچون ایجابی آدیم‌لر کوتاریلگن. امریکا و روسیه جمهور باشلیغ‌لری بیر نیچه مراتبه تلیفون آرقه‌لی ملاقات قیلگن همده بو ایکی مملکت رسمی‌لری بیر بیراوی‌دن یخشی‌لیک بیلن اېسله‌ماقده دیر.
عینی حالده روسیه جمهور باشلیغی ولادیمیر پوتین، بو مملکت نینگ امریکادهگی ایلچیخانه‌سی اوچون ینگی دیپلومات هم تانیشترگن اېدی. امریکا و روسیه آره‌سیده مناسبت‌لر اوکراین اوروشی‌دن ایلگری‌دیک یخشی‌لنیشی مقصدیده، بو مملکت وکیللری آره‌سیده سۉزلشوولر ایلگری آلیب باریلماقده دیر.
اوکراین اوروشی یکونلنیشی ممکن می؟
اوکراین‌ده بو مملکت بیلن روسیه نینگ اوروشی کوتیلمه‌گن حالده ایکی ییلدن کۉپراق بۉله‌دی که دوام اېتیب تورگن. حاضر دونالد ترامپ سیلاو کمپاین‌لریده بیرگن وعده‌سی اساسیده، بو اوروش یکونلنیشی مقصدیده ایجابی آدیم‌لر کوتارگن و بو اینتیلیش‌لر دوامی‌ده، امریکا و روسیه آره‌سیده جدی سۉزلشوولر باشلنگن دیر.
اوشبو سعی‌وحرکتلر اوکراین اوروشی یکونلنیشی خصوصیده امیدلرنی یره‌تگن. امریکا و روسیه اوکراین اوروشی تقدیری خصوصیده بیران کېلیشووگه قۉل تاپکن تقدیرده اوروش یکونلنیشی ممکن دیر و شو باعث بو ایکی مملکت آره‌سیده‌گی سۉزلشوولر نتیجه‌سینی کوتیش لازم.
