عبدالغفار بیانی ملا عبدالرحمن اۉغلی 1331 ییلیده توغیلگن. او، مکتبنی یېتی یاشیده باشلب، 1351 ییلیده یوقاری بهالر بیلن بیترگن. ظاهر شاه دوریدهگی قیین کانکور سیناویدن موفقیتلی اۉتیب، کابل بیلیم یورتی نینگ ادبیات فاکولتهسیگه قبول قیلیندی. بیانی، ادبیات فاکولتهسی نینگ ژورنالیزم بۉلیمیگه کیریب، ایکینچی ییلیده آیخان بیلن اونشتیریلدی. عبدالغفار، 1355 ییلی بیلیم یورتینی بیتیرگن. اونینگ مونوگراف موضوعسی، غیاث الدین خواند میر نینگ امیر علی شیر نوایی فعالیتیگه بغیشلنگن “مکارم الاخلاق” رسالهسیگه تحریر و مقدمه یازیشی اېدی. بو رساله 1360 ییلیده اطلاعات و کلتور وزیرلیگی تمانیدن باسیلگن.
بیانی، واحدی اۉنهریسی بیلن سکیز آیلیک عسکرلیک احتیاط کورسینی اۉقیدی. شونینگدېک، اوچینچی بریدمن درجهسیگه اېگه بۉلهدی. عبدالغفار، 1356 ییلی دولت خذمتیگه، 6-درجه لوازیمده ملی “انیس” گزیتهسی نینگ “ژوندون” ژورنالی نینگ اعضاءسی صفتیده تعیینلندی. 1357 ییلی نینگ ثور آییده، دولت مطبعهسی نینگ باشقروچیسی بۉلیب تعیینلندی. وقتینچهلیک نشرلر و کتابلر نینگ سانسور بۉلیمیده ایشینی شو ییل نینگ عقرب آییگچه دوام اېتیردی.
رحمتلی عبدالغفار بیانی، 1357 ییلیدن 1358 ییلیگچه محلی دستورلر بۉییچه عمومی داریکتر صفتیده، 1358 ییلی عقرب آیی نینگ 13 سنهسیدن اېسه “بیهقی” کتابلرینی چاپ اېتیش و تامینلش انستیتوتی نینگ یېتکچیسی صفتیده خدمت قیلدی. او، رسمی وظیفهسی نینگ دوامیده “ظفر” صنعت گروهینی تشکیل اېتیش و صنتچیلرگه کدرلر تربیهلش بیلن شغلنگن. بیانی؛ تاج محمد، اُستاد غفار کمال، عبدالله درمان، رشیده ژاله، صابر سنبل، چاووش و باشقه صنعتچیلر نینگ قوشیقلرینی افغانستان تلویزیونده قید اېتدی. شو دور آرهسیده بیانی، ابو ریحان ییریک دانشمند و استاد عبدالحکیم شرعی نینگ “یشهسین پرتیه” کتابلرینی نشر اېتیشگه علحیده اعتبار بېریب، صفتلی باسیمدن چیقاردی. شو بیلن بیرگه، ایتیب اۉتیش کېرهک که، سۉنگگی کتابی نینگ 4500 نسخهسی ببرک کارمل حکومتی نینگ قراری بیلن دولت مطبعهسیده یاقیب یوباریلگن. اونینگ بیر قسمی اېسه آلدینراق ترقهتیلگن اېدی.
بیانی 1358 ییلی 6 جدی حادثهسیدن سۉنگ، اخبارات و مدنیت وزیرلیگی رهبرلری بیلن بیرگه قماققه آلیندی. بیراق، قیسقه وقت ایچیده، اوشبو گروه نینگ ایریم کدرلریگه، قماق وقتیده پرچمیلر تمانیدن اونگه قانونی یاردم کۉرستیلگنلیگی طفیلی، آزاد قیلیندی و اویگه قیتدی. رحمتلی بیانی، 1359 ییلی 4 ثوردن 1365 ییلی 25 حملگچه کابل شهری ایچیده سوویت اتفاقی اېلچیخانهسیگه قرهشلی سوویت اتفاقی کتابخانهسی مسوولی صفتیده ایشلهدی.
1365 و 1366 ییللریده بیانی وقتینچهلیک باسیمدن چیقاریش و نشر کمیتهسی نینگ نشریات لوازیملریده فعالیت یوریتدی. اونینگ مدنی همده ژورنالیستیک ایشلری انیق کۉرینیب تورهدی. او، 1367 ییلی 2 دلو قراریگه بنأ، اخبارات و مدنیت وزیرلیگی نینگ تشقی نشریاتی بۉلیمده ایشگه کیردی. چېت اېلدن کېلگن کتابلرنی سانسور قیلیشی کیرهک ایدی. او، تشقی یورتلر کتابلریگه احتیاج بارلیگینی بیلردی.
1369 ییلیده نوایی نینگ 550نچی توغیلگن کونیگه بغیشلب، بیر قنچه شاعر و متفکرلر نینگ اثرلری باسیمدن چیقدی. شو جملهدن اونینگ اولکن اثری “خمسه” (مثنویلر تۉپلمی) دولت مطبعهسیده آفست نشریگه تیارلندی. رحمتلی بیانی تشبثی بیلن دولت مطبعهسیده آفست نشری نینگ تازه، خطاسیز و انیق باسیلیشی ممکن بۉلدی. او، “خمسه” نینگ برچه فورمه نسخهلرینی، اۉز قۉلی بیلن یازگن کیریش سۉزی بیلن بیرگه، داغسیز و ایزسیز(لکهسیز) چاپ اېتدی. حتی بیر نېچه فورمه کتاب اونینگ امضاءسینی آلمسدن و داغلر بیلن ناتۉغری چاپ اېتیلگنلرنی، قیتهدن نشر قیلدی. نوایی نینگ خمسه نشری، مملکت نینگ مدنیت خادملری تمانیدن یوقاری بهالندی. شو ییل سنبله آیی نینگ آخرلریده، بیانی “هیواد” گزیتهسی یېتکچیسی ترکیبیده گزیته ترغیبات بۉلیمی اعضاءسی صفتیده، تعیینلندی. او بو وظیفهنی 1371 ییلگچه دوام بېردی.
مملکتده اسلامی دولت تشکیل اېتیلگچ عبدالغفار، اطلاعات و کلتور وزیرلیگدهگی رسمی وظیفهلریدن تشقری، افغانستان ملی اسلامی جنبش آفیسیده مدنی و اجتماعی فعالیتلرینی باشقریش وظیفهسینی هم بجردی. شو یۉلده او کوپ فدایلیک قیلدی. بیانی و کابلدهگی جنبش اعضالری ایچیده کیلیشمووچیلیک بار ایدی. شو سببدن او، 1371ییلیده بلخ تمان یۉل الدی. او, دوستم نینگ یانیده ایریم فرهنگی ایشلرگه قۉل اوردی. اۉرنک اوچون هنر و صنعت مرکزی آچیب، صنعتچیلرنی بیر یېرگه ییغدی.
جوزجان مرکزی شبرغان؛ اۉشه وقت اندخوی، سرپل و سان چاریکنی اۉز ایچیگه آلر اېدی، بو یېرده فریغونیان باسمه خانهسینی ایجاد قیلیشده همت قیلدی. باسمه خانهده ماشینلر و کېرهکلی بویوملرنی سمنگان و بلخ ولایتلریدن کېلتیردی. اینیقسه، کابل دولت مطبوعاتی نینگ ملکهلی آلتی-یېتی کدرلرینی عایلهلری بیلن بیرگه، جنبش خرجتی بیلن کابلدن آلیب کېلدی. سۉنگ اولر، مونتاژ و باسمه خانه ماشینلری بیلن شغللندیلر. اسلامی جنبش یېتکچیسی مارشال دوستم، نفت تفحصات ریاستی نینگ یاتاق خانهلریدن بیرینی باسمه خانه اختیاریگه قویدی. 1372 ییلی باسمه خانه فعالیت اوچون تیار بۉلدی. اونده رسالهلر، کوندهلیک، جریدهلر، پامفلیتلر، اعلامیهلر، چقریقلر باسیلدی و ترقهتیلدی. اۉرنک: فریغونیان تاریخچهسی نینگ پامفیلیتی، نور جریدهسی، آیینه سرپل، شفا، وحدت و باشقهلر.
بیانی نینگ اېنگ مهم خدمتلریدن بیری، یاش کدرلرنی بیلیم، مدنیت و صنعت یۉنهلیشلریده تربیهلشدیر. او، تعلیم و تربیه یۉلیده کمک و یېتکچیلیک قیلگن کیشیلر قطاریگه؛ محمد صابر سنبل، عبدالسمع صورتچی، الماس بیانی، انجینر عبدالحق اېلدار، انجنیر حبیب الرحمن، انجنیر همایون نظری، خیر محمد چاووش، شکرالله نواچی، شفیع عظیمی و باشقهلردن آت توتیش ممکن. اونینگ ینه تحسینگه سزاوار ایشلریدن بیری بو، کۉپگینه چاپ قاغذینی آلیب کېلیشی اېدی. بو قاغاذلر قریب 15 ییل دوامیده چاپ و کوندهلیک یا گزیته احتیاجلرینی قاندیردی. حتی که، بوگونگی کونده هم اولر قوللنیلماقده. یورت نینگ شمالی 1377ده طالبان قۉلیگه توشگنیدن سۉنگ او تاجیکستانگه مهاجر بۉلدی. او یېر نینگ یورتداشلری بیلن سامانیان لیسهسینی اساس سالدی. اۉزی و تورموش اۉرتاغی شو لیسهده درس بېردی.
بیانی جگر کسللیگیه چلینگنی طفیلی 1379 ییلی جوزا آیی نینگ 18ده عالمدن کۉز یومدی. او تاجیکستان دوشنبهسیده توپراققه بېریلگن. وطندن اوزاقده بۉلگنی سبب، بیانی اجتماعی و فرهنگی مجموعهسیده او اوچون اېسیدهلیک توزهتیش، اثرلری، کییملری و تحریر بویوملرینی قوییش رېجهلنگن. یازووچیلر قلمینی خلققه ترقهتیش و ملت ایچیگه باسمه خانه هیدینی ترهتیش یوکسک مدنیت آدیملریدن سنهلهدی. عبدالغفار بیانی حیاتی، فقط خاطره اېمس، بلکه مدنیت و مسوولیتی نینگ منگولیگی دیر.
