چین جمهور رئیسی شی جینپینگ نینگ ایتیشیچه، یقین شرق «اوروشدن تینچلیککه اۉتیش نینگ مهم باسقیچیده» توریبدی و بو منطقهده اوروشنینگ قَیته باشلنیشی قبول قیلیب بۉلمهیدیگن حالت دیر.
او بوگون چهارشنبه، ۳۰-ثور پکنده روسيه جمهور رییسی ولادیمیر پوتین بیلن اوچرهشووده یقین شرقدهگی وضعیت حقیده تۉختهلیب، حربي حرکتلر درحال تۉختهتیلیشی کېرهکلیگینی ایتدی.
شینهوا خبرگزارلیگی گزارشیگه کۉره، شی جینپینگ صحبت دوامیده فارس کۉرفزی و یقین شرقدهگی وضعیت «اوروش و تینچلیک اۉرتهسیدهگی بوریلیش نقطهسیده» اېکنینی تأکیدلهگن.
اونینگ قۉشیمچه قیلیشیچه: «منطقهدهگی برچه دشمنلیکلر زودلیک بیلن تختهتیلیشی کېرهک.»
چین جمهور رییسی ینه نزاعلر قَیته باشلنیشینینگ آلدینی آلیش و اېنگ مهمی مذاکرهلرنی دوام اېتتیریش ضرورلیگینی قۉشیمچه قیلگن.
شی جینپینگ ایلگری سورگن تۉرت بندلی تشبثینی ینه بیر بار اېسلهتگن. اوشبو تشبث دولتلرنی تینچ-تاتوو یشش، ملی حاکمیتگه حرمت، خلقارا قانونلرگه رعایه قیلیش و رواجلنیش همده خوفسیزلیک بۉییچه موافقلشتیریلگن یاندشوونی قبول قیلیشگه چقیرهدی.
چین رسميلری بو رېجه «اوزاق مدتلی یېچیم» صفتیده بیر نېچه بار ایران بیلن باغلیق مذاکرهلرده هم ایلگری سورگن.
پوتین و شی اوچرهشووی بوگون اېرتهلب پکندهگی «بویوک خلق سرایی»ده باشلنگن. روسيه جمهور رییسی ایکّی کونلیک تشریف دوامیده چین یېتکچیسی بیلن بیر نېچته اوچرهشوولر اۉتکزیشی رېجهلشتیریلگن.
چین و روسيه – ایران نینگ اساسي اتفاقچیلری صفتیده کۉریلهدیگن دولتلر- یقین شرق بۉییچه انیق و آچیق سیاسي موضع بیلدیرهدیمی یاکه یۉق اېرتهگه معلوم بۉلهدی.
