آلمان یېتکرمهلری مملکت شِمالیدهگی آنه و بالهلر اوچون مۉلجللنگن مرکزده یوز بېرگن آتیشمه عاقبتیده آلتی کیشی جان بېرگنینی خبر قیلدی.
«اشپیگل» نشری پولیس معلوماتلریگه تهیهنیب یازیشیچه، حادثه دوشنبه کونی (8-سرطان) محلي وقت بیلن ساعت 12:10 اطرافیده اشتاده شهریده، نیدرزاکسن فدرال یېریده صادر بۉلگن.
خبرگه کۉره، آتیشمه آنه و بالهلر یشهیدیگن اجتماعي قۉللب-قوّتلش مرکزیده یوز بېرگن.
حادثه عاقبتیده مرکز نینگ آلتی نفر خادیمی – تۉرت نفر عیال و ایکّی نفر اېرکک اۉلدیریلگن.
محلي پولیسنینگ معلوم قیلیشیچه، تۉرت عیال و بیر اېرکک بنا ایچیده اۉق آتیب اۉلدیریلگن، آلتینچی قربان اېسه شفاخانهگه آلیب باریلگنیدن سۉنگ آغیر جراحت و کۉپ قان یۉقاتیش عاقبتیده وفات اېتگن.
نیدرزاکسن ایالتی ایچکی ایشلر وزیری دانیلا بهرنس هجومچی اېرکک بۉلگنینی و اونینگ حرکتی آرتیده عایلهوي نزاع یاتگنینی ایتدی.
او مطبوعات انجمنیده هجومچی اۉزی نینگ چقهلاق قیزی اوستیدن وصيلیک مسألهسی بۉییچه عایلهوي کېلیشماوچیلیککه دوچ کېلگنینی معلوم قیلدی.
وزیر نینگ سۉزلریگه کۉره، حادثه وقتیده اېرکک نینگ اوچ آیلیک قیزی و باله نینگ آنهسی هم بناده بۉلگن، بیراق اولرگه ضرر یېتمهگن.
پولیس گمانلنووچینی واقعه جاییده قۉلگه آلگنینی و آنه همده بالهلر مرکزیگه نسبتاً یوزهگه کېلگن خوف برطرف اېتیلگنینی بیلدیردی.
