صدیقه ناملی تورکمن قیزنینگ محکمهلرینی یقیندن کۉریب، گواه بۉلگن منبعلردن بیری بو واقعه خصوصیده ینگی تفصیلاتلرنی شریک قیلدی. اۉزبېک تیوی بیلن شریک اېتیلگن اوشبو منبعنینگ بیاناتیگه کۉره، صدیقه ناملی تورکمن قیزنی مجبوری نکاح قیلیشگه اورینهیاتگن شخص، ایکّی کیشینی نکاح گواهی دېب المشتیریب، توطیه بیلن قضیهنینگ اۉز فایدهسیگه اَیلنتیرماقده دیر.
منبعنینگ ایتیشیچه، صدیقه محکمهده بو کیشیلرنینگ گواهلیگینی نامعقول دېب، او قماقده بۉلگن زمانده بو گواهلیک تیارلنگنینی بیلدیرگن.
شونینگدېک، اوشبو منبعنینگ ایتیشیچه طالبان محکمهسیده صدیقه تامانیدن تیلگه آلینگن گواهلر و عریضهلرده آلیب کېلینگن گواهلرگه اعتبار قرهتیلمهگن و ایریم حالتلرده بو گواهلر قورال بیلن تهدید هم اېتیلگن دیر.
توطیهدن سونگ تهدید
ایتیلیشیچه، صدیقه قضیهسی نینگ تامانی بۉلمیش خداینظر ناملی پشتون خلقیگه منسوب و طالبان بیلن یقین علاقهده بۉلگن شخص نه فقط قضیهده ساخته گواهلر بیلن حرکت قیلگن بلکه بو خصوصده صدیقهنینگ یقینلری و بو واقعهده صدیقهگه ظلم بۉلهیاتگنینی اَیتگن شخصلرنی قورال بیلن تهدید هم اېتیلگن.
صدیقه طلبی اعتبارسیز قالیشی
صدیقه محکمهسی جریانیده بۉلیب کېلهیاتگن شخصلردن بیرینینگ اۉزبېک تیوی اختیاریده قرار تاپکن بیاناتیگه کۉره، بو تورکمن قیز طالباننینگ محکمهسیده اونینگ مجبوری نکاحسی و بو خصوصده ساخته گواهلر تیارلنگنینی بیلدیریب، محکمه قراریگه قرشی اېکنینی اعلام قیلگن. بیراق محکمه صدیقه طلبیگه اعتبار قرهتمهگن.
قماقخانهده صدیقهنینگ ناانیق تقدیری
بادغیس ولایتی، بالامرغاب اولسواللیگینینگ موریچاق قیشلاغیدن بۉلگن تورکمن قیزنینگ قماقدهگی تقدیریگه نسبتن خواطرلر و تنقیدلر دوام اېتر اېکن، بیراق حاضرگچه طالبان بو قیز آزاد اېتیلیشی خصوصیده جدّی سعیوحرکت قیلگن اېمس.
صدیقهگه یقین شخصلرنینگ اۉزبېک تیوی بیلن شریک قیلگن معلوماتلریده، صدیقهگه یقین شخصلر بو خصوصده جیم قالمسلیکنی سۉرهیدیلر.
شو بیلن بیرگه، ایریم منبعلرنینگ اۉزبېک تیوی گه ایتیشیچه بیر قنچه طالبان عملدارلری صدیقه قضیهسیگه عمومی تنقیدلر کۉتریلگندن سۉنگ، اونینگ عایلهسی بیلن اوچرهشیب، محکمه قرارینی قیته کۉریب چیقیلیشیگه وعده بېرگن. بیراق حاضرگچه صدیقه حقیگه قنچهلیک عدالت تامینلنیشی ممکن دیر بېللی اېمس.
