ژورنالیست بۉلیش اینیقسه دغدغهلردن تۉله حاضرگی کونلرده یکّهویالغیز بیر خبر یا گزارشنی یازیش بیلن چېکلنمهیدی بلکه ژورنالیست اولهراق بیر یېتکیرمهده حضورینگیز بۉلگنده روایتلر و خبر شونینگدېک ناقولهی وضعیتلر و اۉنلب خیلمه-خیل واقعهلر آرهسیده اۉزینگیزنی قرار بېریش و اطرافینگیز و دنیاده یوز بېرهیاتگن احواللر ایچیده باتیب کېتیشدن عبارت دیر. شو سبب هر کونی مینگلب سۉز و کلیمه کۉز اۉنگیمدن اۉتهدی. یا خبر یا گزارش یا هم بیر تحلیلنی، اۉقیش، توشینیش و اویلهش بیلن کونوتونلریم یۉقالیب کېتهدی و بو اېسه مېنی حیاتیمنینگ کتّه قسمینی اۉزیگه اختصاصلشتیرگن و بو حقیقتده مېنی بعضیده بیران باشقهچه تورلی کتابلرنی اۉقیشدن مجبوری اوزاقلشتیرهدی.
شوندهی بۉلسه هم بعضیده اۉزیمنی خبر و تحلیل عالمیدن بیراز اوزاقلشتیریش مقصدیده باشقه ساحهلردهگی مطالعهلرگه اۉتیب، باشقه بیران کتاب و مقالهلرنی اۉقیشگه حرکت قیلهمن و بوگونلری بو مطالعهلریم عالمیده قدرلی دوستمیز و کوچلی تویغولی یازووچیمیز امینالله نایل خانگیلدی جنابلرینینگ «نایلنینگ گونلیگی؛ اصلیده هر کیم یازووچی» ایجادینی قۉلیمگه آلگنمن و بو یازوونی قۉلگه آلگنیمده صفحهلر آرهسیدهگی متنلرگه یۉقالیب کېتهمن و ساعتلب اۉقیشگه قیزیقیب قالهمن. بو کتاب شوندهی که عنوانیدن سېزیلیب تورگن مېن اوچون یالغیز بیر قنچه یازوولر و سۉزلرنینگ تۉپلمی اېمس بلکه اۉقیش، یازیش و قلم بیلن کورهشیش مقصدیده، تویغو سَری حرکتلنیش اوچون بیر تورتکی دیر. امینالله نایل خانگیلدینینگ قلمی قنچهلیک تیلیمیزگه یازیش اوچون کوچلی تورتکی بۉلیشینی اونینگ «تورکستان بیرهمی؛ اېرگنهقوون» اثریده بیلیب، توشینگنمن.
ادهشمسم میلادی ۲۰۱۷- ییللر اېدی که بو ایجادنی چوقور قیزیقیش بیلن قۉلگه کېلتیردیم و شو قیزیقیش بیلن اۉقیب تماملهدیم. شوندن سۉنگ، هر کیم اۉزبېک تیلیده قندهی قیلیب اۉقیش و یازیشنی باشلهین دېگنده هر بیریسیگه داکتر خانگیلدینینگ شو اثرینی اۉقینگ. هم سیزنینگ تیلینگیزده توشینرلی یازیلگن هم کتاب ایچیدهگی واقعهلر سیزگه تانیش بو اېسه سیزنی اۉقیش و یازیشگه قیزیقتیرهدی دېب توصیه قیلگنمن و حاضر هم مېنگه ساوغه قیلینگن بو اثرنینگ بیرتهسی کتابنی توصیه قیلیب قیزیقتیرگن آدملریمنینگ بیرینی آلدیده. حاضر اېسه خانگیلدینینگ ینگی بیر اثرینی اۉقیب تورگن اېکنمن بو کیشینینگ ایجادی تیلیمیزده یازیش اوچون حرکتلنتیریش کوچیگه قنچهلیک یوقاری قابلیتگه اېگه اېکنینی تۉلیق توشینیب و گواه بۉلهیبمن.
خانگیلدی بو ینگی اثریده یوقاری مهارت بیلن سیزگه اۉقیش، یازووچیلیک و تویغو آرهسیدهگی باغلیقلیکنی توشینتیرهدی. سیزگه یازووچیلرگه خاص سۉز قدرتی بیلن اۉقیش و مطالعه قیلیش اهمیتی و ضرورلیگی حقیده ایتیب، سیزنی بو خصوصده قیزیقتیرهدی و وجودینگیزدهگی اۉقیش و مطالعه قیلیشگه بۉلگن تنبللیکلرنی یۉقاتیشگه حرکت قیلهدی. شو بیلن خانگیلدی اۉزینینگ «اصلیده هر کیم یازووچی» اثریده، یازووچیلیک مهارت قیزیققن و کتابت و قلم اهمیتنی سېزگن هر بیر انسان اوچون ممکنسیز بیر مهارت اېمس بلکه هر کیمگه بار بیر توانالیک دېب بیلدیرهدی. عینی دَمده، یازووچی اۉز اثریده، هر بیر انساننینگ ذهنیدهگی فکری و یورهگیدهگی تویغوسیدن باشلنگن یازیش مهارت، نوت آلیش و سقلش بیلن آدیممهآدیم رویابگه چیقهدیگن حرکت دېب بیلدیرهدی.
امینالله نایل خانگیلدینینگ «اصلیده هر کیم یازووچی» اثرینینگ کوچلی و ایجابی باشقه تامانلریدن بیری مېنگه بو یېرده عکس اېتیلگن تویغو دیر. یازووچی متنلرده، سیزنینگ اۉقیش و یازیشگه قیزیقتیریب و یۉل کۉرسهتیشی بیلن بیر آنده، یازووچیگه تویغونینگ اهمیتی حقیده هم بیلدیریب اۉتهدی بو که یازیش اۉز تیلینگیزده بۉلگنده قنچهلیک اهمیتلی و آنه تیلیمیز یازووچیلیک اوچون قنچهلیک بای تیل و بو تیلگه یازووچیلیک احوالی قنقهلیگی حقیده یخشیلب توشینتیرهدی. بو اېسه تیلسېور و خلقپرور هر بیر انسان اوچون ایجادنینگ قیزیقیش و بهالی تامانی دیر.
عادتده، انسانلر کتابلرنی اۉقیب تماملهگندن سۉنگره کتاب حقیده فکرینی یازیشگه حرکت قیلهدی، بیراق بو یېرده مېن فرقلیراق، امینالله نایل خانگیلدینینگ «اصلیده هر کېم یازووچی» ناملی اثری حقیده شاشیلیب یازهیبمن و بونگه هم سبب، کتابنینگ اساسی مقصدی بۉلمیش یازووچیلیککه ترغیب اېتیش قدرتی دیر که یازووچی کتابده بو مهارت حقیده یخشی و توشینرلی عینی حالده تورتکی بۉلووچی سۉزلری بیلن مېنی هم کتاب تمام بۉلیشینی کوتیب تورمهی درحال فکریمگه کېلگن نرسهلرنی قلم بیلن چیقریشگه حرکت قیلگنیمده سبب بۉلدی.
خلاصه قیلیب اَیتگنده، ایشانهمن کۉپینچهلرینگیز خودّی مېنی اۉزیمدیک حیاتینگیزدهگی بیر قنچه واقعهلر و حکایهلر حقیده یازیشنی نیت قیلگنسیز و بیر مرته بۉلسه هم اۉزینگیزدن سۉرهگنسیز شونی قندهی یازسم؟ قندهی قیلیب شو واقعهنی قلم بیلن یاریتسم یا هم قندهی یازیشنی باشلهسم دېگنسیز. هیچ بۉلمسه، بو اویلاو فیسبوکدهگی بیر پُست یا ترقهتیش نیتینگیز بۉلگن بیر صورتینگیز حقیدهگی تعریفنی فیسبوکنینگ پُست قیلیش صحیفهسیده کېرگنینگیزده، ذهنینگیزده کېلگن. شوندهی اېکن مهارتلی یازووچی امینالله خانگیلدینینگ «اصلیده هر کیم یازووچی» اثری هر بیریمیز حیاتیمیزده دوچ بۉلگن شو یازووچیلیک سواللریگه یخشیلب جواب بېریش اوچون مهم و تاثیرلی دیر. شوندهی اېکن بو کتابنی هر بیر کیشی اینیقسه هر بیر اۉزبېک یاش-ییگیتگه توصیه قیلگن بۉلردیم. تا نه فقط تیلیمیزنی آغزهگی گپیریشگه سقلب قالهیلیک بلکه قلمیمیز کوچینی هم تیل رواجی اوچون قرهتیشیمیز درکار.
