طالبلرنینگ پنجشیر ولایتی والیسی ادارهسی اوشبو ولایت کانلریدن قزیب آلینگن اوچ مینگ ۹۵قیراط زمرد ساتیلگنی حقیده معلوم قیلدی.
طالبلر والیسینینگ مطبوعات سۉزلاوچیسی سیفالدین لتوننینگ ایتیشیچه، مذکور مقداردهگی زمرد بوگون (سهشنبه،۲۳سرطان) آچیق سودا آرقهلی ایکّی میلیون ۱۱۹ مینگ افغانيگه ساتیلگن.
اونینگ قۉشیمچه قیلیشیچه، اوشبو زمردلر سۉنگگی ایکّی هفته دوامیده پنجشیرنینگ حصه اوّل اولسواللیگیدهگی کانلردن قزیب آلینگن.
طالبلر افغانستانده حاکمیتنی قَیته اېگهلهگنیدن بویان پنجشیرنینگ زمرد کانلرینی منتظم روشده قزیب آلیب، محصولاتلرینی ساتیب کېلماقده.
بوندن تشقری، اوشبو گروه پنجشیردهگی یشیل گرینگارنت، یاقوت و بیروج کانلرینی قزیب آلیشنی هم باشلهگن.
طالبلر تامانیدن مملکت کانلرینینگ قزیب آلینیشی کېنگ تنقیدلرگه سبب بۉلگن. بیر قطار سیاسي آقیملر اوشبو گروهنی افغانستان طبيعي بایلیکلرینی تالان-تاراج قیلیشده عیبلهماقده.
طالبلر اۉز باشقروو خرجتلرینینگ کتّه قِسمینی مملکت کانلریدن قزیب آلینگن محصولاتلرنی ساتیشدن توشهدیگن درآمد حسابیدن مالیهلشتیرماقده.
