طالبلرنینگ عدلیه وزیرلیگی «یېرلرنی ناقانوني اېگهللشنینگ آلدینی آلیش و اېگهللب آلینگن یېرلرنی قَیتریش کمیسیونی» سمنگان ولایتیده۳.۷میلیون جیریبدن آرتیق ییلاو (عمومي ییلاو) یېرلرینی قید اېتگنینی معلوم قیلدی.
وزیرلیک بوگون، یکشنبه (۲۸سرطان) اعلان قیلگن بیاناتیده، سمنگان ولایتیده میلیونلب جېریب یېر اۉرگنیب چیقیلگنی و نتیجهده۳ میلیون۷۰۸ مینگ۶۶۵ جیریب عمومي ییلاو میدانی انیقلنگنینی بیلدیردی.
بیاناتگه کۉره، اوشبو ییلاولر آیبیک شهری همده حضرتسلطان، خرم و سارباغ، فیروز نخچیر، روی دو آب، درهصوف بالا، درهصوف پایین و تاشقُرغان اولسواللیکلریده جایلشگن.
طالبلر عدلیه وزیرلیگی معلوماتیگه کۉره، قید اېتیلگن۳.۷میلیون جیریب ییلاو نینگ۳۷۸ مینگ۵۳۸ جیریبی طبيعي حالتدن چیقریلگن. بو یېرلر اهالی تامانیدن للمی و سوغاریلهدیگن اېکین میدانلری، تورر جایلر، جماعت انشااتلریگه ایلنتیریلگن یاکه باشقه شکللرده فایدهلنیلگن.
طالبلر جاري ییل بهاریدن باشلب مملکت شِمالیدهگی ولایتلرده کېنگ کۉلملی یېر تېکشیروولرینی باشلهگن. گروه آلدینراق سرپل، بلخ، فاریاب و جوزجان ولایتلریده هم میلیونلب جیریب یېرلرنی عمومي ییلاو صفتیده قید اېتگن اېدی.
طالبلر عدلیه وزیرلیگی اعلانلریگه کۉره، اَیریم منطقهلرده دهقانچیلیک یېرلری و محلي اهالینینگ شخصي ملکلری، جملهدن اوی-جایلری هم عمومي ییلاو صفتیده رۉیخطگه آلینگن.
طالبلر ایشلب چیققن «یېرلرنی ناقانوني اېگهللشنینگ آلدینی آلیش و اېگهللب آلینگن یېرلرنی قَیتریش تۉغریسیده»گی قانونگه موافق، گروه بوندهی ملکلرنی اۉز تصرفیگه آلیش حقوقیگه اېگه دېب حسابلهیدی.
