ننگرهار ولایتیدهگی محلي منبعلرنینگ معلوم قیلیشیچه، اوشبو ولایت مرکزی جلال آباد شهریده ایکّی کیشینینگ جسدی تاپیلگن.
منبعلرگه کۉره، جسدلر تیناوون شنبه ۲۷-سرطان ساعت تخمیناً ۵:۰۰ ده جلال آباد شهرینینگ سکّیزینچی ناحیهسیدهگی «پل بهسود» آستیدن تاپیلگن.
خبرلرگه کۉره، جسدلرنینگ قۉل و آیاقلری باغلنگن بۉلیب، تنهلریده پیچاق ضربهلری ایزلری هم انیقلنگن.
منبعلر جسدلر طالبلرنینگ نظارت پوستهسیگه تاپشیریلگنی، سۉنگره ننگرهار ولایت شفاخانهسیگه آلیب باریلگنینی بیلدیردی.
حاضرچه اۉلدیریلگنلرنینگ شخصی، قاتللر و قاتللیک سببی انیقلنمهگن. طالبلرنینگ ننگرهاردهگی محلي رسميلری هم بو حادثه یوزهسیدن ایضاح بېرمهگن.
طالبلر افغانستانده حاکمیتنی قَیته اېگهلهگنیدن بویان مملکتنینگ تورلی ولایتلریده کۉپلب سِرلی قاتللیکلر حقیده خبرلر ترقهلگن.
کۉپ حاللرده بو قاتللیکلر «نامعلوم قوراللی شخصلر» تامانیدن صادر اېتیلگنی ایتیلگن، بیراق طالبان اولرنینگ انیقلنیشی و محکمه قیلینیشی حقیده کمدن-کم معلومات بېرگن.
