امریکا قۉشمه ایالتلرینینگ افغانستاندهگی سابق اېلچیسی رایان کراکر، افغانستانگه اعتبارسیزلیک و بو مملکتدهگی وضعیتنی انکار اېتیش قۉشمه ایالتلر ملي خوفسیزلیگیگه تهدید اېکنینی ایتدی.
رایان کراکر بو فکرلرنی تیناوون (سهشنبه، ۳-سنبله) واشینگتنده «دموکراسی اوچون ملي جمغرمه» تامانیدن تشکیل اېتیلگن تدبیرده بیلدیردی.
او افغانستاندهگی ایچکی اۉزگریشلر فقط بو مملکتنینگ ایچکی مسألهسی اېمسلیگینی، بلکه منطقه و دنیا خوفسیزلیگی، شونینگدېک، امریکا ملي خوفسیزلیگی بیلن هم باغلیق اېکنینی ایتدی.
کراکرنینگ قۉشیمچه قیلیشیچه: «بیز ۱۹۹۰-ییللرده افغانستانگه اعتبارسیزلیک امریکا ملي خوفسیزلیگیگه قندهی ضرر یېتکزگنینی کۉردیک. امید قیلهمنکی و دعا قیلهمنکی، بوندهی حالت ینه تکرارلنمهیدی.»
او عیاللرنینگ ینه بورقه آرتیگه قَیتریلگن بیر دورده اۉز حیاتی، عایلهسی، جمعیتی و مملکتینینگ احوالینی یخشیلش اوچون حرکت قیلهیاتگن افغانستان فقرالرینی قۉللب-قوّتلش مهملیگینی تأکیدلهدی.
رایان تعلیم، عامهوي اخبارات واسطهلری، انسان حقوقلری، عیاللر حقوقلری و مدنی جمعیتنینگ باشقه ساحهلریده فعالیت یوریتهیاتگن بو قتلمنی افغانستاننینگ «دموکراتیک» قتلمی دېب اتهدی.
اونینگ ایتیشیچه، بو ساحهلرده فعالیت یوریتهیاتگنلر «اېنگ آغیر شرایطلرده معمالرگه یېچیم تاپیش اوچون امید و روحیتنی تیریک سقلب تورهدیگن» انسانلردیر.
امریکانینگ افغانستاندهگی سابق اېلچیسی جمهوریت تیزیمی نینگ قولهشی و طالبلرنینگ حاکمیتگه قیتهدن کېلگنی نینگ بېشینچی ییللیگینی «افغانستان نینگ ظلمتگه قَیتیشی نینگ قیغولی ییللیگی» دېب اتهدی و طالبلر مملکتنی قَیته شکللنتیریشگه اورینهیاتگنینی ایتدی.
اونینگ ایتیشیچه، طالبلر جمعیتنی قَیته شکللنتیریش آرقهلی «عیاللرنینگ بۉیسونیشی و اېرککلرنینگ حکمرانلیگی»گه اساسلنگن، خلق اېسه «سیلنمهگن امیر»گه اطاعت قیلهدیگن ترتیبنی اۉرنهتیشگه اینتیلماقده.
بیراق او بو سفر افغانستان جمعیتی طالبلرنینگ بیرینچی حکمرانلیگی دوریدهگی جمعیتدن فرق قیلیشینی و طالبلر اۉزلری ایستهگن ترتیبنی اۉرنهتیشده موفقیت قازانه آلمهسلیگیگه امید بیلدیردی.
اونینگ ایتیشیچه، سوادلی و بیلیملی اولاد، مدنی جمعیت، مستقل عامهوي اخبارات واسطهلری همده امیدنینگ اساسي منبعی بۉلگن افغان خلقی موجود اېکن، طالبان خلق روحیتینی سیندیره آلمهیدی.
او۲۰۰۱ و ۲۰۰۲-ییللردهگی افغانستاندهگی ماموریتی دوامیده باشدن کېچیرگن خاطرهلرینی سۉزلب، «امریکا خلقارا ترقیات اگېنتلیگی» نینگ دستلبکی سعی-حرکتلریدن بیری قیزلر مکتبلرینی قَیته آچیش بۉلگنینی تأکیدلهدی.
او ۲۰۰۱ییلده کابلگه قیلگن سفری چاغیده طالبلر چېکلاولری سببلی تعلیم آلیشدن محروم بۉلگن۱۲ یاشلی قیزلر تعلیم آلیش امکانیتیدن فایدهلنیش اوچون آلتی یاشلی قیزلر بیلن بیرگه بیرینچی صنفده اۉتیرگنینی کۉرگنینی ایتدی.
رایان کراکر باميانگه قیلگن سفری حقیده هم گپیریب، بوتون دنیا بودا هیکللرینینگ ویران قیلینگنیدن خبردار بۉلگنینی، بیراق دنیا بیلمهگن، اۉزی اېسه یقیندن کۉرگن نرسه هزارهلر جمعیتی اېکنینی ایتدی. اونینگ تأکیدلشیچه، بو جمعیت قطعیت، اراده و متانت بیلن مملکتنی قَیته قوریشگه اینتیلگن همده عیاللر و انسان حقوقلرینی قۉللب-قوّتلش اولرنینگ قرشیلیک حرکتینینگ اساسینی تشکیل اېتگن.
امریکانینگ افغانستاندهگی سابق اېلچیسی مملکتدهگی حاضرگی وضعیتگه تۉختهلیب، بوگونگی کونده هم افغانستان ملي خوفسیزلیگینینگ منطقوي و امریکا ملي خوفسیزلیگی بیلن چنبرچس باغلیقلیگی سببلی افغانستان نینگ دموکراتیک جمعیتینی قۉللب-قوّتلش مهم اېکنینی ایتدی.
