پاکستاننینگ «دان نیوز» نشری اۉز مقالهسیده پاکستان حکومتی و افغانستاندهگی طالبلر اۉرتهسیدهگی مذاکرهلرنی قَیته باشلش بۉییچه دیپلوماتیک سعی-حرکتلر دوام اېتهیاتگنینی یازدی.
نشرنینگ یازیشیچه، چین کابل و اسلام آباد اۉرتهسیدهگی کېلیشماوچیلیکلرنی کمهیتیریشگه اینتیلماقده.
چیننینگ افغانستان بۉییچه مخصوص وکیلی یقینده پاکستانگه تشریف بویورگن و ایتیلیشیچه، سفردن کۉزلنگن مقصد اورومچی جریانینی قَیته باشلش بۉلگن.
پاکستان تشقی ایشلر وزیرلیگی مطبوعات سوزلاوچیسی چهارشنبه کونی اۉتکزیلگن مطبوعات انجمنیده چیننینگ سعی-حرکتلرینی آلقیشلهگن، بیراق بو جریاننی ایلگری سوریش فقط طالبلرنینگ جدّي عملي قدملری بیلنگینه ممکنلیگینی تأکیدلهگن.
«دان نیوز»نینگ یازیشیچه: «افغانستانده طالبلر حکمرانلیگی شرایطیده مذاکرهلرنی قَیته باشلش بۉییچه دیپلوماتیک سعی-حرکتلر دوام اېتهیاتگن بیر پیتده، پاکستان تشقی ایشلر وزیرلیگی هم تأکیدلهگنیدېک، مذاکرهلر فقط کابل افغانستان توپراغیده جایلشگن ترورچی گروهلرنی قۉللب-قوّتلشگه برهم بېریش بۉییچه جدّي مجبوريت آلسه، موفقیتلی بۉلیشی ممکن.»
نشر طالبلرنینگ پاکستان ملي مدافعه بیلیم یورتیده (NDU) سۉزلهگن اېلچیسی نطقیگه هم توختهلیب، بو حالت اصلیده غیرعادي بۉلمسلیگی ممکنلیگینی، بیراق ایکّی تامانلهمه مناسبتلر اېنگ قویی درجهگه توشگن بیر پیتده افغانستان دیپلوماتی پاکستاننینگ اېنگ مهم مدافعه بیلیم یورتیده نطق سۉزلهگنی اعتبارگه مالک اېکنینی یازگن.
بیراق «دان نیوز»نینگ قید اېتیشیچه، افغانستانده جایلشگن ترورچی گروهلر تینچلیک یۉلیدهگی اېنگ کتّه تۉسیق بۉلیب قالماقده.
پاکستان اوردوسینینگ جماعتچیلیک بیلن علاقهلر ریاستی (ISPR) کېچه افغانستان چېگرهسی آرقهلی پاکستانگه کیریشگه اورینگن بیر گروه ترورچیلر یۉق قیلینگنینی معلوم قیلدی. اوردو مطبوعات خدمتی «افغانستان طالبان رژیمی چېگره نظارتینی تأمینلش بارهسیده منتظم روشده موفقیتسیزلیککه اوچرهماقده»، دېیه تأکیدلهدی.
«دان نیوز» مقالهسیده طالبلر پاکستان طالبلر حرکتی (تیتیپی) جنگچیلری و اولر نینگ عایلهلرینی عمومي چېگره یقینیدهگی حدودلردن کۉچیریش کبی چارهلرنی کۉرگنی ایتیلهدی. شونینگدېک، طالبلر یېتکچیسی تیتیپیدن پاکستانگه قرشی هجوملرنی توختهتیشنی سۉرهگنی حقیده هم خبر بېریلگن.
بیراق «دان نیوز»نینگ یازیشیچه، بو چارهلر اساسن تشقی کۉرینیشدهگی قدملر بۉلیب، یقیندهگی چېگره تۉقنهشووی هم کۉرسهتگنیدېک، اولرنینگ تیتیپی و باشقه ترورچی گروهلرگه تأثیری چېکلنگن.
«دان نیوز»نینگ تأکیدلشیچه، دیپلوماتیک سعی-حرکتلر موفقیتلی بۉلیشی اوچون پاکستان تشقی ایشلر وزیرلیگی تأکیدلهگن یۉل خریطهسیگه عمل قیلیش کېرهک. بونینگ اوچون طالبلردن افغانستان حدودیدن پاکستانگه قرشی فایدهلنیلمسلیگی حقیده «یازمه و تېکشیریلیشی ممکن بۉلگن کفالتلر» آلیش طلب اېتیلهدی.
