بیرلشگن ملتلر تشکیلاتینینگ انسان حقوقلری بۉییچه مخصوص گزارشگری ریچارد بنت اۉز گزارشیده طالبلرنینگ عیاللرنینگ حرکتلنیشی و طبي خدمتلردن فایدهلنیشیگه قۉیگن چېکلاولری جدّي عاقبتلرگه، اینیقسه، بالهلر اوچون آغیر تأثیرلرگه آلیب کېلهیاتگنینی بیلدیرگن.
حساباتده هلمند ولایتیدهگی بیر عیالنینگ سۉزلری کېلتیریلگن. او محرمی یۉقلیگی سببلی قیزیدن اَیریلگنینی ایتگن.
طالبلر محرمی بۉلمهگن عیاللرنینگ طبي خدمتلردن فایدهلنیشینی تعقیقلهگن.
بیرلشگن ملتلر تشکیلاتی مخصوص گزارشگری حساباتیده هلمنددهگی بیر عیالنینگ سۉزلری قوییدهگیچه کېلتیریلگن: «قیزیم تون بۉیی کسل بۉلیب یاتدی. اېریم اویده اېمس اېدی، مېنی شفاخانهگه کوزهتیب بارهدیگن آدم یۉق اېدی. اونی شفاخانهگه آلیب باریشگه موفق بۉلگنیمیزده اېسه جوده کېچ بۉلگن اېدی. محرمسیز بۉلگنیم اوچون قیزیمدن اَیریلدیم.»
بیرلشگن ملتلر تشکیلاتینینگ انسان حقوقلری بۉییچه مخصوص گزارشگری افغانستانده بالهلر و اۉسمیرلر سلامتلیگی ساحهسیدهگی اوزاق ییللیک بحران همان دوام اېتهیاتگنینی ایتگن. اوشبو بحران سورونکهلی تۉییب طعاملنمسلیک، ساغلیقنی سقلش تیزیمینینگ ضعیفلیگی همده طبي خدمتلردن یېترلی درجهده فایدهلنه آلمهسلیک بیلن باغلیق.
اونینگ ایتیشیچه، سۉنگگی پیتلرده مالی منبعلرنینگ قیسقریشی، انسانپرورلک یاردملرنینگ کمهییشی و انسانپرورلیک تشکیلاتلری فعالیتیگه تأثیر قیلهیاتگن جندرگه اساسلنگن چېکلاولر بو معمالرنی ینهده کوچهیتیرگن.
بیرلشگن ملتلر تشکیلاتینینگ خبرچیسی عیاللر و قیزلر اوچون طبي تعلیم، جملهدن، نرسلیک بۉییچه اۉقیشگه قۉییلگن کېسکین چېکلاولر حیاتي مهم انسان منبعلرینینگ ضعیفلشیشیگه آلیب کېلهیاتگنینی تأکیدلهگن. بو چېکلاولر حرکتلنیش اېرکینلیگیگه قۉییلگن تۉسیقلر بیلن بیرگه عیاللرنینگ طبي خدمتلردن فایدهلنیش امکانیتینی ینه-ده کمهیتیرماقده.
طالبلر قیزلرنی تعلیمدن، جملهدن، طبیات یۉنهلیشلریده اۉقیشدن محروم قیلهیاتگن بیر پیتده، افغانستانده عیال شفاکارلر یېتیشماوچیلیگی موجود. حاضرده اَیریم حدودلرده عیال متخصص شفاکارلر عموماً یۉق. شو بیلن بیرگه، طالبلر عیال بېمارلرنی اېرکک شفاکارلر تامانیدن دوالشنی هم چیکلهگن.
