طالبلر سۉزلاوچیسی ذبیحالله مجاهدنینگ ایتیشیچه، سۉنگگی بیر ییل دوامیده افغانستانده ۹۹ مینگ کیشی سرطان کسللیگیگه چلینگن.
مجاهد بوگون، چهارشنبه، ۱۸-سنبله کابلدهگی مطبوعات انجمنیده معلوم قیلیشیچه، بو رقم دولت طبیات مؤسسهلریده رۉیخطگه آلینگن و طبي خدمتلردن فایدهلنگن بېمارلر سانینی انگلهتهدی.
مجاهدنینگ ایتیشیچه، ۱۴۴۷-قمری ییل دوامیده (۱۴۰۴-ییل ۶-سرطانیدن ۱۴۰۵-ییل ۲۶-جوزاگچه) ۹۹ مینگدن آرتیق سرطان کسللیگیگه چلینگن بېمار طبي خدمتلردن فایدهلنگن.
اونینگ قۉشیمچه قیلیشیچه، شو دورده کابلده سرطان کسللیکلرینی انیقلش و دوالشگه مۉلجللنگن ۲۰۰ اۉرینلی شفاخانه هم فعالیتینی باشلهگن.
طالبلر تامانیدن اعلان قیلینگن ینگی آماری معلوماتلر افغانستانده سرطان کسللیگی کېسکین آشگنینی کۉرستماقده.
۲۰۲۰-ییلگچه افغانستان اسلام جمهوریتی حکومتی ساغلیقنی سقلش وزیرلیگینینگ ییللیک حساباتلریده هر ییلی قریب ۲۰مینگ کیشی سرطان کسللیگیگه چهلینیشی قید اېتیلگن. اولر نینگ۱۵ مینگ نفری آلتی آیدن بیر ییلگچه بۉلگن مدتده وفات اېتگن، قالگنلری اېسه مملکت ایچیده یاکه خارجده دوالنگنیدن سۉنگ حیاتینی سقلب قالگن.
افغانستان بۉییچه حاضرچه فقط کابل شهریده سرطان کسللیگینی انیقلش و دوالش بۉییچه بیرته اختصاصلشگن مرکز فعالیت یوریتهدی. حاضرده او ۲۰۰ اۉرینلی شفاخانهگه ایلنتیریلگن. ولایتلرده اېسه حاضرگچه اوشبو کسللیکنی انیقلش و دوالش بۉییچه بیرارته هم اختصاصلشگن مرکز موجود اېمس.
طالبان و پاکستان اۉرتهسیدهگی اوروش سبب چېگره اۉتیش یۉل یاپیلیشیدن آلدین کۉپلب سرطان بېمارلری دوالنیش اوچون پاکستانگه، خصوصاً، پشاور و کراچیدهگی شفاخانهلرگه بارردی. بیراق چېگره یاپیلگچ، خارجده دوالنیش امکانیتی هم کېسکین چېکلنگن. حاضرده فقط مالی امکانیتی یېترلی بۉلگن آز سانلی بېمارلر هندستان و ایرانگه دوالنیش اوچون آلیب کېتیلماقده.
