دنیادهگی خوفسیزلیک وضعیتی و ترتیبی سۉنگگی ییللرده ییریک اوروشلر و ماجرالر سبب اۉزگردی. ینگی اوروش جبههلری آچیلماقده، تۉقنهشوولر آقیمی تورلی شهرلر و حدودلرگه کېنگهییب، موجود ماجرالرنینگ تاثیری باشقه حدودلرگه هم ترقهلماقده. شو بیلن یقین شرق حدودی، دنیادهگی اینگ کېسکین وضعیتگه دوچ بیر حدودگه اَیلنگن. بیر نیچه ییل ایلگری خوفسیزلیگی و تینچلیک وضعیتلری یوقاری بهالنهیاتگن سعودی عربستان کبی مملکتلر حاضرده، اوروش و ناتینچلیک یاقّهسیده تورگن. دېیرلی ایران، امریکا و اسراییل اۉرتهسیدهگی سونگّی اوروشدن سۉنگ ماجرانینگ تاثیری عرب دولتلریگه هم ترقهلماقده. حاضر اېسه سعودی عربستان بو کون و کېچهلر، حوثیلرنینگ کوچلی تهدیدی بیلن دوچ بۉلیب حتا که مدینه و مکه شهرلری هم خوفسیزلیگینی یۉقاتگن.
اۉتگن آقشم، حوثیلر تامانیدن مکه و کعبه حدودیگه درون یۉنهلتیریلگنی حقیده ترقهلگن خبرلر سعودی عربستان و ایران تامانیدن قۉللب-قۉتلنگنی ایتیلگن یمن حوثیلری اۉرتهسیدهگی ضدیتنی ینهده کېسکینلشتیردی. شوندی بیر وضعیتده، حاضر مملکتلر تامانیدن بو اوروشلرنی یکونلنتیریش اوچون سیزیلرلی بیر حرکت قۉلگه آلینماقده بلکه عکسینچه، بو وضعیتده کوچلرینی کۉرسهتیش اوچون اینتیلیشلر دوام اېتماقده دیر و شو سبب، ایریم اوروش و ماجرالرنینگ دوام اېتتیریشی ممکن بۉلگن اتفاقلر توزیلماقده.
شو بیلن بیرگه، قۉییدهگی ایکّی اتفاق و قرهمه-قرشیلیک توزیلگنده حاضرگی تارتیشوولر ینگی بیر کورینیشده کوچهییشی ممکن:
۱. سعودی عربستان اسراییلدن یاردم سۉرهشی
سعودی عربستاننینگ حوثیلر تهدیدیگه قرشی اسراییلدن استخباراتی یاردمی سۉرهگنی و بو مساله خصوصیده امریکانینگ اوروش وزیرلیگی «سنتکام» آرقهلی علاقه اۉرنهتیلگنی حقیدهگی خبرلر سعودی عربستان و اسراییل اۉرتهسیدهگی یقینلشوونینگ کوچهییشی احتمالینی کۉرسهتهدی. بو همکارلیک و اتفاق اۉرتهگه کېلگن تقدیرده، اسراییل و ایران اۉرتهسیدهگی ترنگلیکلر ینگی بیر کۉرینیشده کوچلنیب، سعودی عربستان هم مستقیم بو ماجراگه قوشیلیشی ممکن.
۲. مکهگه قیلینگن هجوم و شیعه-سنی ضدیتلری خوفی
مکهگه هجوم قیلینگنی حقیدهگی خبر شیعه و سنیلر اۉرتهسیدهگی ضدیتلرنینگ کوچهییشی خوفینی هم یوزهگه کېلتیرماقده. اسلامی همکارلیکلر تشکیلاتی بو هجومنی کېسکین قارهلهدی. پاکستان اوردوسی باشلیغی عاصم منیر و بو مملکت دین علمالری کېنگشی باشلیغی هم بو مسالهده مناسبت بیلدیریب، مکه و مدینهگه هجوم عاقبتیدن آگاهلنتیرگن.
سعودی عربستان، پاکستان و تورکیه اۉرتهسیدهگی یقینده امضالنگن مدافعه بیتیم هم موجود بیر وضعیتده، بو هجوملر، شیعه و سنی ضدیتلرینی هم اۉرتهگه آلیب چیقیشی ممکن دېگن خواطرنی تۉغدیرهدی.
منطقه ترتیبی قیسی تامان کېتماقده؟
حاضرگچه منطقهدهگی اوروش و ماجرالرنی یکونلشگه قرهتیلگن انیق و برقرار قدملر کۉزگه کۉزگه کۉرینمهیپتی. عکسینچه، دولتلر اۉز کوچی و خوفسیزلیک صلاحیتینی نمایش اېتماقده. بوندهی وضعیت اېسه یقین شرقدهگی بېقرارلیک و خوفسیزلیک بیلن باغلیق خطرلرنینگ ینهده کوچهییشیگه آلیب کېلیشی ممکن. شوندی اېکن حاضرده، یقین شرقدهگی بو ماجرالر تېزآرهده یکونلنیشی سیزیلمهیپتی. بو اېسه نه فقط منطقه احوالینی آغیرلشتیریشی ممکن بلکه دنیا ترتیبی اوستیده هم سایه تشلهیدی. دېیرلی بو وضعیتنینگ عاقبتی فقط بیر منطقهدهگی ناتینچلیکلرگه خلاصه بۉلیب قالمهی. نفت نرخی یوقاری کېتیشی کبی اقتصاد و باشقه ساحهلرنی هم کوتیلمهگن وضعیتلر بیلن دوچ قیلماقده.
